Binəqədidə bir neçə orta məktəbin açılışı olub – FOTO

Bakı şəhərinin Binəqədi rayonundakı 32 orta ümumtəhsil məktəbinin hamısında “15 sentyabr - Bilik günü” və yeni dərs ilinin başlanması münasibətilə bayram tədbirləri keçirilib. Binəqədi rayon İcra Hakimiyyətindən Lent.az-a verilən məlumata görə, 3, 100, 126, 244, 246, 276 və 284 saylı məktəblərdə əsaslı təmirdən sonra açılış mərasimləri təşkil olunub.

Xocasən qəsəbəsindəki 103 saylı orta məktəbdə isə 32 sinif otaqlı 640 şagird yerlik əlavə tədris korpusunun açılışı baş tutub. 3, 102 və 276 saylı məktəblərin bayram tədbirlərində çıxış edən icra başçısı Xaləddin İsgəndərov mərasim iştirakçılarını təbrik edib. O, ölkə rəhbərliyi səviyyəsində təhsilə göstərilən dövlət qayğısından bəhs edərək, belə gözəl şəraiti olan məktəblərin şagirdlərindən gözəl nəticələr gözlədiyini vurğulayıb.

Qeyd edək ki, açılış mərasimlərinə həmçinin Binəqədi rayonundan millət vəkilləri seçilmiş Madər Musayev və Rafael Cəbrayılov da qatılıb.