Fuad Ələsgərov: “Bu, idarəçilik sistemində yeni mərhələdir” - MÜSAHİBƏ

Azərbaycan Respublikası Prezidenti Administrasiyasının hüquq mühafizə orqanları ilə iş şöbəsinin müdiri Fuad Ələsgərov Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətə başlaması ilə bağlı AzərTAc-a müsahibə verib. Lent.az həmin müsahibəni təqdim edir:
- Azərbaycan Respublikasının Prezidenti 2012-ci il sentyabrın 6-da “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi”nin fəaliyyətinin təmin edilməsi ilə bağlı Fərman imzaladı. Yeni yaradılmış qurumun fəaliyyətini necə görürsünüz?

- Vətəndaşlara Xidmət və Sosial İnnovasiyalar üzrə Dövlət Agentliyinin əsas ideyası vətəndaşlara xidmətlərin daha keyfiyyətli, rahat, vahid məkandan və müasir innovasiyaları tətbiq etməklə göstərilməsindədir. Azərbaycan Respublikasının Prezidenti İlham Əliyev bu ideyanın təcrübədə tətbiqini təmin etmək və dövlət qurumları tərəfindən göstərilən xidmətləri vətəndaşlara daha yaxın etmək məqsədi ilə bu Fərmanı imzalayıb.
Dövlət Agentliyinin yaradılmasını mühüm islahat hesab etmək olar. Bu dövlət idarəçiliyində yeni mərhələdir və yüksək peşə vərdişlərinə yiyələnmiş, etik davranış qaydalarına dönmədən riayət edən gənc nəsil dövlət qulluqçularının yetişməsinə təkan verəcək. Qurumun fəaliyyətə başlaması insanların həyatına müəyyən dəyişikliklər gətirəcək, onların müsbət gözləntilərini cavablandıracaq və cəmiyyətdə vətəndaş məmnunluğu yaradacaq. Əhaliyə dövlət orqanları tərəfindən göstərilən bir sıra xidmətlər daha operativ və keyfiyyətli olacaq, onların ehtiyacları yüksək səviyyədə təmin ediləcək. Bununla dövlət orqanlarına etimad da artacaq.
Qurumun fəaliyyəti ümumi olaraq bu sahədə aparılan institusional islahatların səmərəliliyini yüksəldəcək.

-Siz “ASAN-Xidmət” mərkəzlərini qeyd etdiniz, bu mərkəzlərin fəaliyyəti və rolu nədən ibarət olacaq?

- “ASAN-Xidmət” mərkəzləri dövlət orqanları tərəfindən göstərilən xidmətlərin vahid və əlaqələndirilmiş formada həyata keçirilməsini təmin edəcək. Bu, vətəndaşların vaxt itkisini azaldacaq. Belə ki, vətəndaş mərkəzə daxil olaraq məlumat köşkündən əldə etmək istədiyi sənəd üçün hansı şöbəyə və hansı sənədlərlə müraciət etməli olduğunu öyrənir və həmin şöbənin pəncərəsində elektron növbə əsasında gözləyir. Daha sonra növbəsi çatdıqda xidmətin həyata keçirilməsi üçün tələb edilən sənədləri təqdim edə və əldə etmək istədiyi sənədi müəyyən olunmuş müddətlərdə götürə bilər. Mərkəzlərdə vətəndaşların məlumat əldə etməsini asanlaşdırmaq məqsədi ilə elektron lövhələr və işarələr yerləşdiriləcək və xidmətlər qeydiyyat yerindən asılı olmayaraq bütün vətəndaşlar üçün həyata keçiriləcək. Mərkəzlər, həmçinin təqvimin bütün günlərində vətəndaşlara fasiləsiz açıq olacaq. Mərkəzlərdə vətəndaşların gözləməsi və vaxtını səmərəli keçirməsi üçün uşaq əyləncə mərkəzi, internet-kafe, bank, poçt şöbələri və s. olacaq. Mərkəzlərdə şəffaflığın təmin edilməsi üçün və əməkdaşların fəaliyyəti üzrə qiymətləndirmənin aparılması məqsədi ilə bütün zəruri tədbirlər görüləcək.

- “ASAN-Xidmət” mərkəzlərində hansı xidmətlər göstəriləcək?

- Fərmana əsasən “ASAN-Xidmət” mərkəzlərində vətəndaşlıq vəziyyəti aktlarının dövlət qeydiyyatı, notariat fəaliyyəti, şəxsiyyət vəsiqələrinin, ümumvətəndaş pasportlarının verilməsi və dəyişdirilməsi, sürücülük vəsiqələrinin dəyişdirilməsi, məhkumluq barədə arayışların verilməsi, mənzillərin dövlət qeydiyyatı ilə bağlı təkrar çıxarışların və əhali arasında daha çox “forma 1” kimi tanınan əmlakın yüklülüyü barədə arayışların, o cümlədən torpaq kadastrı məlumatları barədə arayışların verilməsi, əmək pensiyalarının təyin edilməsi, kommersiya hüquqi şəxslərin və vergi ödəyicilərinin qeydiyyatı, hüquqi və fiziki şəxslərə arxiv arayışlarının verilməsi kimi xidmətlər daxildir. Buraya, həmçinin gömrük bəyannamələrinin, gömrük rəsmiləşdirilmələri üçün sənədlərin qəbulu, Azərbaycan Respublikasında müvəqqəti və daimi yaşamaq üçün icazə sənədlərinin verilməsi aiddir. Mərkəzlər, həmçinin dövlət orqanlarının göstərdikləri bütün xidmətlər üzrə informasiya təminatını həyata keçirəcək.
Qeyd edilən xidmətlər vətəndaşın birbaşa müraciəti əsasında, özünəxidmət və çağırış xidməti formasında göstəriləcək. Gələcəkdə isə səyyar xidmətlərin həyata keçirilməsi nəzərdə tutulur. Səyyar xidmətlər vasitəsilə vətəndaşların qanunla müəyyən edilmiş məbləğdə əlavə haqq ödəməklə öz iş və ya yaşayış yerini tərk etmədən xidmətlərdən yararlanması mümkün olacaq. Onu da vurğulamaq istərdim ki, əlillər və sağlamlıq imkanları məhdud olan uşaqlar üçün səyyar xidmətlər pulsuz olacaq.

- “ASAN-Xidmət” mərkəzlərinin fəaliyyətinin təşkili və xidmətlərin göstərilməsi qaydalarının layihəsi hazırlanarkən digər ölkələrin də təcrübəsi nəzərə alınıbmı?

- Əlbəttə, bizim üçün yeni olan belə bir sosial innovasiyanın həyata keçirilməsi zamanı ən yaxşı beynəlxalq təcrübələr öyrənilib, qaydalar isə elə tərtib edilib ki, vətəndaşlara göstərilən xidmətlər bütün cəhətlərdən asan olsun. Bu prosesdə Böyük Britaniya, Almaniya, Kanada, Rusiya, Avstraliya və sair ölkələrin təcrübəsi nəzərdən keçirilib. Bizim həyata keçirməyə hazırlaşdığımız “ASAN-Xidmət” konsepsiyası isə daha miqyaslı və əhatəlidir, çünki daha çox dövlət qurumunun xidmətlərini özündə birləşdirəcək. Təbii ki, tədricən Mərkəzlərin fəaliyyəti genişlənəcək və inanıram ki, bu innovasiya özünü səmərəli təcrübə kimi doğruldacaq.