“Bizi yalnız Azərbaycan torpaqlarının işğaldan azad edilməsi maraqlandırır”
30 dekabr 2010 11:34 (UTC +04:00)

“Bizi yalnız Azərbaycan torpaqlarının işğaldan azad edilməsi maraqlandırır”

“Ermənistanla imzalanmış protokollar Böyük Millət Məclisinin Xarici Əlaqələr Komissiyasındadır. Biz bu məsələni gündəliyə daxil etmirik. Azərbaycan proseslərdən məmnun olmadan, ermənilər işğal etdikləri torpaqlardan çıxmadan, Türkiyəyə qarşı iddialarından vaz keçmədən biz protokolları gündəliyə daxil etməyəcəyik”.



Bu sözləri APA-ya açıqlamasında Türkiyə Böyük Millət Məclisi Xarici Əlaqələr Komissiyasının sözçüsü, hakimiyyətdəki Ədalət və İnkişaf Partiyasının (AKP) Bolu millət vəkili Mətin Yılmaz deyib. O, bir çox təhlilçinin mövcud vəziyyətin Türkiyədə gələn ilin iyununda keçiriləcək parlament seçkilərinə qədər davam edəcəyi, sonra isə vəziyyətin dəyişəcəyi barədə rəyinə də münasibət bildirib: “Ermənilər bu məsələni həll etməyənə qədər, yəni Azərbaycan torpaqları işğaldan azad olunmayana qədər biz bu məsələni komissiyada müzakirəyə çıxarmayacağıq. Bu məsələdə iqtidar və müxalifət birlikdə hərəkət edir. Azərbaycan parlamentindən gələn qardaşlarımıza da bunu söylədik. Komissiya sədrimiz Murad Mərcanın rəhbərlik etdiyi nümayəndə heyəti Bakıya gedib eyni mövqeni orada da nümayiş etdirdi”.


İsveçrənin yeni təşəbbüsünün olub-olmadığı barədə sualı cavablandıran M. Yılmaz Türkiyənin bölgədə sülh və sabitlik arzuladığını söyləyib: “Əgər bu istiqamətdə dünyanın hər hansı nöqtəsində addımlar atılarsa, biz də dəstək verərik. Əgər dünyanın bu işlə maraqlanan ölkələri bizim istəmədiyimiz addımları atarsa, biz buna qarşı çıxarıq. Qafqazın ən böyük problemi Azərbaycan torpaqlarının uzun müddətdən bəri işğal altında olmasıdır”.
1 2 3 4 5 İDMAN XƏBƏRLƏRİ
# 570

Oxşar yazılar