Azərbaycandakı parlament seçkiləri AŞ PA-nın gündəliyində

Bu barədə APA-ya bu gün AŞ PA MK-nın Parisdə keçirilən iclasında iştirak edən Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov deyib.

O bildirib ki, iclas Monitorinq Komitəsinin qış sessiyası ərəfəsində keçirilən sonuncu iclası olub. İclasda müzakirə olunan əsas məsələnin Avropa Şurasında islahatlar olduğunu söyləyən deputat bildirib ki, həm Monitorinq Komitəsi, həm digər qurumlar, həm Nazirlər Komitəsi islahatların həyata keçirilməsi ilə bağlı mövqelərini ortaya qoyurlar: “Bununla bağlı geniş və ətraflı müzakirələr həm Monitorinq K-də, həm AŞ-da islahatlarla bağlı yaradılmış xüsusi komitəsində baş verir. Bununla bağlı yanvar sessiyasında daha geniş fikir mübadiləsi aparılacaq. Monitorinq Komitəsinin iclasında islahatlarla bağlı ümumi cizgilər və əsas istiqamətlər müəyyənləşdirilib”.

S. Seyidovun sözlərinə görə, iclasda müxtəlif ölkələrə aid məsələlər müzakirə olunub. «Moldovada seçkilər və seçkidən sonrakı vəziyyət, ciddi müzakirə olundu. Ermənistan üzrə yeni məruzəçi seçildi, Gürcüstan və başqa ölkələrlə də bağlı müzakirələr aparıldı”.