Soyuq duşun orqanizmə faydası

Soyuq duş və ya vanna qəbul etmək, həmçinin payız və qışda təmiz havada idman etmək arıqlamağa və immunitet sisteminizi gücləndirməyə kömək edir.

Lent.az xəbər verir ki, aparılan araşdırmanın nəticələrinə görə, müntəzəm olaraq soyuq duş qəbul edən insanlar daha az xəstələnir. Üç min könüllünün iştirak etdiyi təcrübə göstərdi ki, hətta 30 saniyə soyuq suya məruz qalma da immunitet sistemini gücləndirə bilər. Çox güman ki, qan dövranını və limfa axını stimullaşdırır, bu da bədənin müdafiəsini aktivləşdirməyə kömək edir.

Oxşar nəticələr payız və qış aylarında təmiz havada fiziki məşqlər etməklə əldə edilə bilər. Bundan əlavə, Aston Universitetinin britaniyalı tədqiqatçılarının fikrincə, belə məşq zamanı yandırılan kalorilərin sayı artır. Bu, istilik üçün əlavə səy sərf etmək ehtiyacı ilə bağlıdır. O da qeyd olunur ki, təmiz havada fiziki məşqlər ürək əzələsində daha az stress yaradır.

Soyuq duş və ya vanna qəbul etməklə enerji istehlakını artıra bilərsiniz. Hollandiyadakı Leiden Universiteti Tibb Mərkəzindən Mariette Boon tərəfindən aparılan araşdırma soyuq suya məruz qalma nəticəsində yaranan titrəmənin termogenezi artırdığını müəyyən edib. Bu, əlavə kalori sərfinə səbəb olur.