Toto Kutunyo 35 il əvvəl "Avroviziya" qalibi olanda necə görünürdü? - VİDEO

35 il əvvəl Toto Kutunyo “Avroviziya” beynəlxalq mahnı müsabiqəsində qalib gəlib. O, 1990-cı ildə öz səsi və xarizması, eləcə də simvolik mahnısı ilə Avropanı fəth edib.

Lent.az xarici mediaya istinadən xəbər verir ki, həmin dövrdə əfsanəvi italyan müğənninin necə göründüyünü və onun çıxışını nəyin əlamətdar etdiyini xatırlamaq qərarına gəlib.

“Avroviziya-1990” harada keçirilib?

35-ci Avroviziya mahnı müsabiqəsi 1990-cı il mayın 5-də Zaqrebdə (o zaman Yuqoslaviya tərkibində Xorvatiya Sosialist Respublikası) keçirilib. Bu, bir il əvvəl “Rock Me” mahnısı ilə qalib gələn yuqoslav qrup Riva sayəsində mümkün olub. Bu müsabiqə Yuqoslaviyanın ev sahibliyi etdiyi ilk və yeganə Avroviziya olub – ölkənin dağılmasından cəmi bir il əvvəl. Müsabiqədə 22 ölkə iştirak edib.

“Avroviziya-1990” Avropada Berlin divarının süqutundan sonra və Maastrixt müqaviləsinin imzalanması ərəfəsində böyük siyasi dəyişikliklərin baş verdiyi atmosferdə keçirilib.

Norveç və Avstriyanın mahnıları birbaşa olaraq divarın süqutuna həsr olunub. İtaliyanı təmsil edən Toto Kutunyo isə “Insieme: 1992” adlı mahnını ifa edib. Bu mahnı birləşmiş Avropa ideyasına və gələcək Avropa İttifaqının yaradılmasına həsr olunub.

Toto Kutunyonun “Insieme: 1992” mahnısı nə haqqındadır?

“Insieme” – “birlikdə” deməkdir, 1992-ci il isə mahnının adında simvolik tarix olaraq qeyd olunub. O dövrdəki planlara görə, vahid Avropa iqtisadi və siyasi ittifaq şəklində məhz 1992-ci ildə formalaşmalı idi.

Mahnı Avropa xalqlarının birliyini, əməkdaşlıq və sülh ideyasını tərənnüm edir. Burada sərhədsiz ortaq gələcək yaratmağa çağırış var – bu ideyalar 1989-cu ildə Berlin divarının yıxılmasından sonra xüsusilə aktual idi.

Toto Cutugno 35 Yıl Önce Eurovision'u Kazandığında Nasıl Görünüyordu (video)

Niyə bu mahnı simvolik olub?

Mahnı 1980–90-cı illərin qovşağında Avropada hökm sürən siyasi əhval-ruhiyyəni çox uğurla əks etdirib – ölkələr Soyuq Müharibədən sonra birgəyaşayışın yeni formatlarını axtarırdılar.

Burada sevgi və şəxsi hisslərdən deyil, birlik, ümid və əməkdaşlıqdan bəhs olunur ki, bu da o dövrdə “Avroviziya” çıxışları üçün qeyri-adi sayılırdı.

Toto Kutunyonun çıxışı səmimiliyi və emosionallığı ilə fərqləndi, həmçinin müxtəlif Avropa ölkələrindən olan bək-vokalistlərin xor şəklində çıxışı mahnının ideyasını dəstəkləyərək yadda qalıb.