Tarda muğam ifa edən kanadalı xanımdan yeni paylaşım

Azərbaycan tarını və muğamlarını dünyaya tanıdan ukraynalı Polina Dessiatnitçenko növbəti paylaşımı ilə diqqət çəkib.

O, Yaponiyada Fuci dağı mənzərəsi fonunda tarda muğamımızı ifa edib. "Sarı gəlin" mahnısını həm çalıb, həm oxuyan Polina yerli radiolarımızdan birinə Azərbaycan dilində müsahibə də verib.

Lent.az-ın məlumatına görə, Polina hazırda Yaponiya Universitetlərindən birində dərs deyir.

1988-ci ildə Rusiyanın Belqorod şəhərində doğulan və hazırda Kanadada yaşayan Polina Azərbaycan dilində rahat danışır.

Onun Azərbaycan mədəniyyətinə, dilinə, xüsusən muğam sənətinə sevgisi sonsuzdur. Polina 5 ildir muğamlarımızın həm elmi, həm də praktiki tədqiqi ilə məşğuldur. O, 10 yaşında olarkən ailəsi ilə Kanadaya köçüb.

Muğamımıza həvəs də Kandada azərbaycanlı sənətkarların konserti zamanı yaranıb. Ona qədər orkestrdə fortopianoda ifa edən Polina maraqlanıb, axtarıb tapıb və yerli sənətkarlarımızdan muğamın sirlərini öyrənib. Bu işdə ona xalq artistləri Ramiz Quliyev, Elxan Mansurov, Elxan Müzəffərov, Vamiq Məmmədəliyev, Aslan Məmmədov kömək ediblər. İndi Azərbaycan muğamlarını mükəmməl bilən bu xanım dünyanı gəzərək müxtəlif ölkələrdə tarla muğamlarımızı ifa edir və bunu sosial şəbəklərdə paylaşır.