Əyyub Quliyev Sankt-Peterburq Dövlət Filarmoniyasının səhnəsində

Konsertdə A.Toskanini adına dirijorların IX beynəlxalq müsabiqəsinin qalibi, azərbaycanlı dirijor Əyyub Quliyevin rəhbərliyi ilə Sankt-Peterburq Filarmoniyasının Akademik simfonik orkestri çıxış edib.

Əyyub Quliyev Lent.az-a bildirib ki, orkestrin ifasında dünya musiqi şedevrləri səslənib. Solistlər Kraliça Yelizaveta adına beynəlxalq müsabiqəsinin laureatı Denis Kojuxin və Vokalçıların beynəlxalq “Leyla Qeyser” müsabiqəsinin laureatı Anna Lapkovskaya olub. Konsert Sankt-Peterburq musiqisevərləri arasında böyük maraqla qarşılanıb. Belə ki, konsertdən iki gün əvvəl təşkilatçılar əlavə yerlərə bilet satışını elan edib və 2 saat ərzində həmin biletlər satılıb qurtarıb.

Əyyub Quliyev qeyd edib ki, konsertdən əvvəl Sankt-Peterburqun “Avropa” otelində “Musiqi Olimpi” festivalının təşkilatçıları və iştirakçılarının mətbuat konfransı keçirilib. Konfransda “Musiqi Olimpi” Fondunun prezidenti İrina Nikitina, Sankt-Peterburq Kinematoqrafiya İttifaqının idarə heyətinin sədri Dmitriy Mesxiev və Əyyub Quliyev da iştirak edib. Mətbuat konfransından sonra festival iştirakçıları N.A. Rimski-Korsakov adına Sankt-Peterburq Dövlət Konservatoriyasının tələbələri ilə görüşə dəvət olunublar.

Xəyalə