Ən çox qazanan Hollivud məşhurları – SİYAHI

Lent.az-ın “Vanity Fair” jurnalına istinadən verdiyi məlumata görə, siyahının birinci pilləsində məşhur rejissor Ceyms Kameron qərarlaşıb.

O, keçən il 257 milyon dollar qazanıb və bu sahədə rejissoru olduğu “Avatar” filminin xüsusi çəkisi var. İkinci yerin sahibi 100 milyon dollar qazanmış Conni Deppdir. Aktyor bu pulları əsasən “Alisa möcüzələr diyarında” və “Karib dənizinin quldurları: Qəribə sahillərdə” filmlərindən qazanıb. Siyahının üçüncü yerində rejissor Stiven Spilberq qərarlaşıb. Onun ötən il ərzində 80 milyon dollar qazancı olub.

Siyahının dördüncü pilləsinin sahibi rejissor Kristofer Nolandır. “Başlanğıc” filmi ona 69 milyon dollar qazanc gətirib. Ümumilikdə o, keçən il 71,5 milyon dollar qazanıb. 2010-cu ildə aktyor Leonardo Di Kaprio da pis gəlir əldə etməyib. Aktyor sərvətini 62 milyon dollar artırıb.

Altıncı yerdə rejissor Tim Berton (53 milyon dollar), yeddinci yerdə aktyor və rejissor Adam Sendler (50 milyon dollar), səkkizinci yeri rejissor və prodüsser Todd Fillips (54 milyon dollar) qərarlaşıb. “Alaqaranlıq” filmində rol alan Teylor Lotner sərvətini 33,5 milyon dollar artıraraq keçən il ən çox qazanan 9-cu Hollivud ulduzudur. İlk onluğu “Şerlok Xolms” filmi sayəsində 31,5 milyon dollar qazanan Robert Daun qapayır.