Bəstəkar Azər Dadaşovun əsərlərinin ifası üzrə müsabiqə elan edilib
24 iyun 2009 10:30 (UTC +04:00)

Bəstəkar Azər Dadaşovun əsərlərinin ifası üzrə müsabiqə elan edilib

Qaliblərə pul mükafatı veriləcək

Azərbaycan Bəstəkarlar İttifaqı Azərbaycan Mədəniyyət Fondunun dəstəyi ilə 2009-cu ilin Uşaq ili elan edilməsi və Azərbaycan Bəstəkarlar İttifaqının 75 illiyi ilə əlaqədar olaraq tanınmış bəstəkar, əməkdar incəsənət xadimi Azər Dadaşovun fortepiano əsərlərinin ən yaxşı ifaçısı üzrə müsabiqə elan edib. Bu barədə Lent.az-a məlumat Azərbaycan Bəstəkarlar İttifaqının mətbuat xidmətindən verilib.

Azərbaycanda uşaq, yeniyetmə və gənclər arasında musiqi sənətinə həvəsin artırılması, musiqi zövqünün formalaşması, müasir Azərbaycan bəstəkarlarının uşaqlar üçün yaratdıqları əsərlərin təbliği, fortepiano üzrə təhsil alan şagirdlərin repertuarının yeniləşməsi, xüsusi istedada malik uşaq və gənclərin aşkara çıxarılması məqsədilə, yaşı 1991-ci il təvəllüdündən böyük olmayan ifaçılar arasında keçiriləcək müsabiqə 3 mərhələdən ibarət olacaq. Müsabiqənin münsiflər heyəti Bəstəkar İttifaqının üzvləri, Bakı Musiqi Akademiyasının professorlarından təşkil ediləcək. Müsabiqənin I yer qalibi 700 manat və I dərəcəli Diplom, II yer – 600 manat və II dərəcəli Diplom, III yer – 500 manat və III dərəcəli Diplom və 2 Həvəsləndirici mükafat - hər biri 400 manatla mükafatlandırılacaq.

Qeyd edək ki, müsabiqənin nəticələri üzrə xüsusi disk buraxılacaq. Diskə müsabiqə qaliblərinin, habelə II mərhələdə fərqlənən iştirakçıların ifasında Azər Dadaşovun fortepiano pyesləri yazılacaq.

Lalə Yusifqızı
# 521

Oxşar yazılar