“Mənim Şuşam” gənc rəssamın gözüylə -

Lent.az-ın məlumatına görə, tədbiri giriş sözü ilə fondun Avropa və MDB ölkələri üzrə rəhbəri Tural Kərimov açıb. O bildirib ki, “Mənim Şuşam” sərgisi Qarabağ Fondunun Azərbaycanda keçirdiyi ilk tədbirdir: “Fondumuzun keçirdiyi ilk tədbir məhz Qarabağla, Şuşayla bağlı olmalı idi. Bunun üçün də “Mənim Şuşam” sərgisi ən uyğun tədbir olaraq seçildi”.

T.Kərimovun sözlərinə görə, bu sərgi noyabrda Vaşinqtonda da açılacaq. Həmin ay Heydər Əliyev Fondunun dəstəyi ilə “Mənim Qarabağım” sərgisi də keçiriləcək. Bunlarla yanaşı, Qarabağ Fondu martda Amerikada Azərbaycan ayının qeyd olunmasını da planlaşdırır.

Gənclər və idman nazirinin müavini İntiqam Babayev isə çıxışında 23 yaşlı Həlimə Ələsgərovanın yaradıcılığından söhbət açıb. Əslən Şuşadan olan, Bakıda dünyaya göz açan Həlimənin əsərlərində Şuşanın əlvan boyalarla əks olunduğunu söyləyib: “Bunun özü də Qarabağ mübarizəsində bir təbliğat xətti kimi qiymətləndirilə bilər. Çünki məhz incəsənət, mədəniyyət ən yaxşı təbliğat vasitəsi sayılır. Rəsm əsərlərinin isə ən böyük üstünlüyü ondadır ki, onların tərcüməyə ehtiyacı yoxdur”.

Millət vəkili Qənirə Paşayeva da çıxışında bu gənc rəssamın əsərlərini yüksək qiymətləndirib.

Qeyd edək ki, “Mənim Şuşam” sərgisində rəssamın 30-a qədər əsəri nümayiş olunub. sərgi 3 gün davam edəcək.

Xəyalə