Mirzə Fətəli Axundzadənin 200 illiyi qeyd edilib

Azərbaycan Dövlət Akademik Milli Dram Teatrında görkəmli maarifçi və ictimai xadim, milli dramaturgiyamızın banisi Mirzə Fətəli Axundzadənin 200 illik yubileyinə həsr olunmuş təntənəli tədbir keçirilib. Lent.az-ın məlumatına görə, dövlət və hökumət rəsmilərinin, tanınmış elm, mədəniyyət və incəsənət xadimlərinin iştirak etdiyi tədbir teatrın foyesində Axundzadə haqqında yazılan ədəbiyyat, dramaturqun əsərlərindən hazırlanan tamaşaların səhnələrinin əks olunduğu fotolarla tanışlığı ilə başlayıb. Daha sonra çıxış edən baş nazirin müavini Elçin Əfəndiyev dramaturqun həyat və yaradıcılığı haqqında danışıb. Azərbaycan xalqının ictimai fikrinin formalaşmasında ciddi dəyişiklik etdiyini vurğulayan Elçin Əfəndiyev bildirib ki, ədib öz qəhrəmanlarını bilavasitə həyatdan götürüb.

Bildirilib ki, prezident İlham Əliyevin 2010-cu il 13 aprel tarixli Sərəncamına uyğun olaraq M.F.Axundzadənin 200 illik yubileyi ilə əlaqədar ölkəmizdə silsilə tədbirlər keçirilib. Görkəmli ədibin yubileyi çərçivəsində keçirilən bu tədbirlər ölkəmizdə böyük mədəniyyət bayramına çevrilib. E.Əfəndiyev 2012-ci ilin TÜRKSOY tərəfindən “Mirzə Fətəli Axundzadə ili” elan olunduğunu, bütün türk dünyasında onun xatirəsinin ehtiramla yad edildiyini, müxtəlif ölkələrin teatrlarında əsərlərinin oynanıldığını bildirib. Elçin Əfəndiyev həmçinin onu da qeyd edib ki, M.İ.Rudomino adına Ümumrusiya Dövlət Xarici Ədəbiyyat Kitabxanasının atriumunda Azərbaycanın görkəmli yazıçısı, filosofu və humanisti Mirzə Fətəli Axundzadənin abidəsi qoyulub.

Tədbirin bədii hissəsində M.F.Axundzadənin qəhrəmanlarının və dramaturqun özünün obrazının əks olunduğu ədəbi kompozisiya təqdim edilib. Axundzadənin obrazını xalq artisti Nurəddin Mehdixanlı canlandırıb.

Jalə