19 ölkədən 50 film

Lent.az-ın məlumatına görə, açılış mərasimində çıxış edən festival qərargahının üzvü, Mədəniyyət və Turizm Nazirliyinin Kinematoqrafiya şöbəsinin sektor müdiri Yusif Şeyxov bildirib ki, müsabiqəyə 19 ölkədən 50 film qatılıb: “Qalibləri beynəlxalq münsiflər heyəti müəyyən edəcək. Münsiflər heyətinə Serbiya Kinematoqrafçılar İttifaqının sədri Yovan Markoviç rəhbərlik edir. Festivalın qalibi “Qran Pri” mükafatına layiq görüləcək”.

Yusif Şeyxov onu da vurğulayıb ki, tədbirdə Münsiflər Heyətinin üzvləri - Bolqarıstandan Olimpiya mükafatçısı Vanya Bermendjiyeva , Belarusdan Mixail Jdanovski, xokkey üzrə 8 qat dünya, 2 qat olimpiya çempionu Vladimir Petrov, Azərbaycandan əməkdar incəsənət xadimi, kinorejissor Cəmi Fərəcov təmsil olunur: “Festival çərçivəsində keçiriləcək müsabiqədə Azərbaycan iki filmlə təmsil olunacaq. Müsabiqədə 2 nominasiya üzrə 3 mükafat təqdim olunacaq.

Festivalda filmlərin nümayişi Nizami Kino Mərkəzinin zallarında keçiriləcək.

Festival iştirakçıları ən yüksək mükafat - "Qran-Pri" ilə yanaşı "İdman və cəmiyyət", "İdman və şəxsiyyət" müsabiqə nominasiyalarında iştirak edəcəklər. Bundan əlavə münsiflər heyəti tərəfindən "Xüsusi mükafat" da təqdim olunacaq.

Jalə Məmmədli