Tarixin ən varlı adamı: İlk dəfə üzünü göstərdilər - VİDEO

Alimlər üç min dörd yüz ildə ilk dəfə olaraq qədim Misirin ən məşhur və varlı fironlarından biri Tutanxamonun əcdadı III Amenhotepin üzünü yenidən yaradıblar. Layihəyə braziliyalı qrafik dizayneri Cicero Morais rəhbərlik edib. O, müasir texnologiyadan istifadə edərək, mumiyasının tədqiqatlarından əldə edilən məlumatlar əsasında fironun üz cizgilərini rekonstruksiya edib.

Lent.az-ın xarici mediaya istinadən xəbərinə görə, III Amenhoter eramızdan əvvəl 14-cü əsrdə hökm sürmüş və Misir tarixinin ən böyük hökmdarlarından biridir. Onun dövrü sülh və firavanlıq dövrü idi. III Amenhotepi təsvir edən heykəllərin çoxluğuna baxmayaraq, onun həqiqi görünüşü haqqında hələ də dəqiq bir fikir yoxdur. Müasir rekonstruksiya üsulları fironun ən etibarlı obrazını yaratmağa imkan verib.

Yenidənqurma prosesində fironun kəllə sümüyünün fotoşəkilləri və canlı donorların məlumatlarından istifadə edilərək burun, qulaq, göz və dodaqlar yaradılıb. Morais Amenhotepin bədən quruluşu ilə bağlı tarixi məlumatları da nəzərə alaraq onu güclü bir insan kimi təsvir edib. Nəticə, fironun ənənəvi zərgərlik və geyimlərlə tamamlanmış, orijinallıq və vizual cəlbedicilik əlavə edən tam büstü olub.

Flinders Universitetinin arxeoloqu Maykl Habichtin dediyinə görə, 1970-ci illərdə aparılan araşdırmalar Amenhotep III-ü artıq çəkili, hərəkətsiz və həyatının son mərhələlərində sağlamlıq problemləri yaşayan biri kimi təsvir edir. Firon çox hündür deyildi - onun boyu təxminən 156 sm idi.

Onun misilsiz sərvətindən də bəhs edilir, bunu Misirdə qızılın “qum qədər çox” olduğunu iddia edərək, firondan qızıl hədiyyələr üçün yalvaran xarici diplomatların məktublarında vurğulanır. Bəzi fərziyyələr III Amenhotepin mumiyasının qızıl yarpaqla örtüldüyünü söyləyir.

III Amenhotepin simasının bərpası təkcə elmi maraq kəsb etmir, bu, əfsanəvi hökmdarın həyatına qayıdışdır, müasir insanlara onun dövrünü və nailiyyətlərini daha yaxşı başa düşməyə imkan verir. Bu layihə keçmişlə bu gün arasında bir növ körpü olub, bəşər tarixinin əsas simalarından biri ilə “tanışmaq” imkanı yaradıb.