Pomidorun qabığı niyə qalın olur? - Bağbanlardan sadə həll yolları

Bağda yetişdirilən pomidorların qabığının qalın və sərt olması çox vaxt isti hava, su çatışmazlığı və ya sort xüsusiyyətləri ilə bağlı olur.

Lent.az-ın xarici mediaya istinadən xəbərinə görə, mütəxəssislər bildirirlər ki, düzgün qulluq etməklə bu problemin qarşısını almaq mümkündür.

Ən əsas səbəblərdən biri bitkinin kifayət qədər su almamasıdır. Quraqlıq zamanı pomidorun böyüməsi ləngiyir və meyvə nəmini qorumaq üçün qabığını qalınlaşdırır. Eyni zamanda nizamsız suvarma meyvələrin çatlamasına və çiçək ucu çürüməsinə də səbəb ola bilər. Bağbanlar torpağın daim nəm saxlanmasını tövsiyə edirlər. Xüsusilə isti günlərdə torpağın təxminən 5 santimetr dərinliyə qədər nəm qalmasına diqqət edilməli, güclü istilərdə isə həftədə 2-3 dəfə suvarma aparılmalıdır. Torpağın nəmliyini daha uzun müddət qorumaq üçün malçdan istifadə də faydalıdır.

Pomidorun qabığının qalınlaşmasına səbəb olan digər amil güclü günəş şüalarıdır. Uzun müddət yüksək temperaturun təsiri altında qalan meyvələrin qabığı sərtləşə, üzərində sarı və ya açıq rəngli günəş yanığı ləkələri əmələ gələ bilər. Bunun qarşısını almaq üçün bitkinin yarpaqları həddindən artıq budanmamalıdır. Yarpaqlar pomidoru birbaşa günəş şüalarından qoruyur. Havanın həddindən artıq isti keçdiyi günlərdə kölgələndirici torlardan istifadə etmək də məsləhət görülür.

Mütəxəssislər qeyd edirlər ki, bəzi pomidor sortlarının qabığı təbii olaraq daha qalın olur. Xüsusilə uzunsov və çatlamağa davamlı növlər bu xüsusiyyəti ilə seçilir. Belə pomidorlar təzə yeməkdən daha çox sous və konserv hazırlamaq üçün əlverişlidir.