Zarina:”... ürəyimcə oldu”

Müğənni Zarina Məmmədova Macarıstanda keçirilən folklor festivalından qayıdıb. Lent. az-ın məlumatına görə, Şuşa İcra Hakimiyyətinin təşkilatçılığı ilə Macarıstanın Döndöş şəhərinə yollanan Azərbaycanın nümayəndə heyəti arasında Zarina ilə yanaşı gənc ifaçı Günay İmamverdiyeva və Şuşa məktəbliləri də olub.

10 gün davam edən festival çərçivəsində Azərbaycanla yanaşı Gürcüstan, Braziliya, Çin, Ukrayna, Serbiya, Fransa və digər ölkələr öz musiqi və rəqslərini nümayiş etdiriblər.

Zarina festival haqda bunları deyib: “Festival çox ürəyimcə oldu. Bizi gözəl qarışladılar və düşünürəm ki, layiqincə çıxış etdik. Hər bir ölkənin festivalda öz çıxış günü var idi. Çıxışımız tamaşaçıların ürəyincə oldu. Çoxlu sayda qonaqlarla yanaşı Macarıstandakı səfirimiz Vilayət Quliyev və Şuşa İcra Hakimiyyətinin başçısı Bayram Səfərov da bizi böyük maraqla izlədilər”.

Qeyd edək ki, festivalda Zarina “Heyratı”, “Səmayi-Şəms” zərb muğamlarını, “Şuşanın dağları”, “Qarabağ”, “Sarı gəlin”, “Yaşa Azərbaycan” və digər xalq mahnılarını oxuyub.