Bəhram Bağırzadə seçkilərdə İlham Əliyevi dəstəkləyəcək- Səbəbini açıqladı

Fevralın 7-də Azərbaycanda növbədənkənar Prezident seçkiləri keçiriləcək. İndiyədək 7 nəfərin namizədliyi qeydə alınıb. Ayrı-ayrı tanınmış şəxslər növbədənkənar prezident seçkilərində kimi dəstəkləyəcəkləri barədə açıqlamalar verirlər.

Belə mədəniyyət xadimlərindən biri də aktyor, naşir, şoumen Əməkdar artist Bəhram Bağırzadədir.

O, Lent.az-a verdiyi açıqlamada yeganə namizədinin Prezident İlham Əliyev olduğunu, ondan başqa bu vəzifəyə layiq olan başqa insan tanımadığını bildirib.

“Prezident İlham Əliyevdən başqa bu çətin vəzifəni yerinə yetirə biləcək insan tanımıram. Yeni tarix yaratmış insandır. Bundan əlavə, mənim özümün İlham Əliyevə, Mehriban xanım Əliyevaya can borcum var. Koronovirus pandemiyası dönəmində onların diqqət və qayğısı sayəsində ölümdən dönmüşəm desəm, yeri var. Mərkəzi Gömrük Xəstəxanasında günlərdə reanimasiyada qalmışam, ölümün nəfəsini hiss edirdim. O dövrdə Mehriban xanımın üzərimdə xüsusi diqqət var idi. Həm də tək mənə yox, bütün ailəmə diqqət göstərmişdi. Mehriban xanım özü şəxsən mənim övladlarıma zəng edib, vəziyyətləri ilə maraqlanmış, ürək-dirək vermişdi. Bu diqqət hələ də davam edir. Baxmayaraq ki, 3 il keçib, hələ də məni müayinələr üçün çağırırlar, nəzarəti davam etdirirlər. Göydə Allah, yerdə İlham Əliyev olmasaydı, bu gün bu açıqlamanı verə bilməzdim, həyatda olmazdım. Bu pafos deyil. Ölümlə bir dəfə üz-üzə gəlmiş insanın səmimi ürək sözləridir”,- deyə Bəhram Bağırzadə bildirib.