“Yaxşı Cazibə”nin ssenaristi: “Azəri qardaşlarımızın həssaslığını nəzərə almadım”

Türkiyənin ATV telekanalında yayımlanan “Yaxşı Cazibə” serialının son bölümü ilə bağlı söhbətlər səngimək bilmir. Lent.az-ın “haberturk” saytına istinadən verdiyi xəbərə görə, filmin ssenaristi Gani Müjdə yerli telekanalların birində çıxış edərək, məsələ ilə bağlı yenidən açıqlama verib.

O, bildirib ki, onların yaratdıqları obrazlar heç də hansısa bir ölkəni təmsil etmir: “Yaratdığımız bir çox obrazlar var və onlar hər rolu oynaya bilərlər. Hər obraz onların özlərindən soruşulur. Mənim üçün obrazlar doğulur, böyüyür və ölür”.

Ssenarist bildirib ki, o, ssenarini yazarkən azərbaycanlıların məsələyə belə həssaslıqla yanaşacağını düşünməyib: “Əgər Cazibəni öldürsəydim hər kəs ağlayacaqdı, komediya filminin final bölümünün ağlayaraq bitməsini istəmədim. Kamal və Simgə xarakterlərini evləndirdim. Amma azəri qardaşlarımızın hissiyyatını hesablamadım. Sonradan onlardan üzr istədim. Pis bir şey etdiyimə mən hələ inanmıram. Filmin istehsalçısı ilə aktyor arasında olan problemlər mənim üzərimə yıxıldı. Mən sadəcə filmin ssenarisini yazmışam”.