Şairə:” Yəqin Arif Qazıyevin evinin qapısının zəngi yoxdur...”-FOTO

Şairə Sevinc Akifqızı xalq artisti Arif Qazıyevin verilişlərin birində onun şeirinə qeyri-ciddi yanaşmasını ittiham edib. Sevinc Akifqızı Lent.az-a açıqlamasında deyib ki, verilişlərin birində Arif Qazıyevə şairənin dünyasını dəyişən anasına həsr etdiyi şeirdən bir parça oxunub.

Şairənin sözlərinə görə, Arif Qazıyev isə şeirə atmaca atmaqla münasibət bildirib: “Görünür, ya mövzu tapmayıblar, ya da ki, müzakirə etdikləri şeirləri oxumayıblar. Şeirin birində belə bənd var: “Bəs niyə əllərin qapımı döymür”. Bu, ana mövzusudur və dünyasını dəyişən analara həsr olunub. Allah heç bir bəndəsinə ana, ümumiyyətlə valideyn itkisi nəsib etməsin. Qaldı ki, müzakirəyə bu, həyatda olmayan analarımıza hörmətsizlikdir.

O biri şeirdə isə məhəbbət əks olunub. İki sevən gənc bir-birindən küsüb və oğlan xanıma çox acılar yaşatdığı ücün yazılıb. Yəni xanım tərəfindən söylənən fikirdir.O, bənd isə belədir: “Axi, nə üzlə sən qapımı döyürsən”.

Arif Qazıyevə bir ziyalı kimi hörmətim var, amma təəssüf edirəm ki, belə bir insan şeirin mövzusunu bilmədən deyir ki, yəqin evlərinin qapısında zəng yoxdur. Məncə bu, ziyalı bir şəxsə yaraşan cavab deyil. Mən jurnalistika fakültəsini bitirmişəm və ziyalı ailədə doğulmuşam. 15 il jurnalistika sahəsində çalışmışam, daha bəzi “jurnalistlər” kimi tibb texnikumunu bitirməmişəm. Ona görə də, düşünürəm ki, belə şeylər yolverilməzdir”.