QOCA QULDURLAR: 25 milyonluq yeraltı anbarı necə təmizlədilər? - VİDEO

2015-ci ildə Britaniya kriminalistika tarixinin ən cəsarətli soyğunlarından biri baş verib. Yaşlı kişilər pul və zinət əşyalarının saxlandığı anbarın beton divarını qazıblar.

Lent.az xarici mediaya istinadla xəbər verir ki, Londonun zərgərlik məhəlləsində yerləşən “Hatton-Qarden” yeraltı depozitarının qarət edilməsi Britaniya tarixində ən böyük oğurluq olub. Cinayət 2015-ci il aprelin 2-də, Pasxa bayramının ən qızğın vaxtında, ölkənin bütün maliyyə qurumlarının ənənəvi bank tətillərində olduğu bir vaxtda törədilib.

Anbara girmək üçün cinayətkarlar ağır bir sənaye qazma qurğusundan istifadə edərək yaxınlıqdakı lift şaftından 50 santimetrlik beton divarında nəhəng bir çuxur qazıblar.

Təxminən 25 milyon funt-sterlinq dəyərində nağd pul, qiymətli daşlar və zinət əşyaları olan 73 seyfin içindəkilər oğruların şikarına çevrilib.

Video müşahidə kameralarının çəkilişinə əsasən ehtimal olunan cinayətkarlara mediada Kventin Tarantinonun "Ouduz itləri" adlı kult filmindəki kimi Mister Qırmızı, Mister Güclü, Mister Montana, Mister Qent, Hündürboy və Qoca kimi ləqəblər verilib.

Oğurluq planını dörd yaşlı kişi hazırlayıb həyata keçirib. Onlar 77 yaşlı Con Kollinz, 63 yaşlı Daniel Cons, 69 yaşlı Terri Perkins və 76 yaşlı Brayan Rider olub. Onlardan başqa cinayətdə daha dörd nəfərin əli olub: 59 yaşlı Karl Vud, 60 yaşlı Uilyam Linkoln, 42 yaşlı Con Harbinson və 48 yaşlı Hyu Doyl.

Kollins, Cons, Perkins və Linkoln hər biri yeddi il həbs cəzası alıb. Vud altı il, Doyl iki il müddətinə azadlıqdan məhrum edilib. Con Harbinson təqsirli bilinməyib. Dəstə lideri Brayan Rider məhkəmənin qərarı ilə altı il üç ayını dəmir barmaqlıqlar arxasında keçirməli olub.

Bu hadisələrə əsaslanan ssenari eyniadlı mini-serialın əsasını təşkil edib. Bundan əlavə, Maykl Keynin baş rolda oynadığı "Hatton-Qardendə Gecə” bədii filmi də istehsal olunur. Əvvəllər bu hekayənin Signature Entertainment studiyasının kino versiyası - "Hatton-Qarden bağında quldurluq" ekrana çıxmışdı.

Son vaxtlara qədər müstəntiqlər oğurlanmış əmlakın əksəriyyətinin kimliyini etibarlı şəkildə müəyyən edə bilməyiblər və cəmi dörd milyon funt-sterlinq dəyərində nağd pul və əşyalar sahiblərinə qaytarılıb. Lakin sonradan məhkəmənin müsadirənin qalan hissəsinin qanuni sahiblərinə qaytarılması barədə qərar qəbul etmək üçün kifayət qədər əsasları olub.