Pensiyaçılara kredit verilməməsi qərarının səbəbi AÇIQLANDI

Maliyyə Bazarlarına Nəzarət Palatası pensiyaçılara kredit verilməsinin qadağan olunması ilə bağlı qərarın səbəbini açıqlayıb. Lent.az xəbər verir ki, ANS-ə açıqlama verən palatanın direktorlar şurasının sədri Rüfət Aslanlı pensiyaçılara kredit verilməsinin tamamilə qadağan olunmasından söhbət getmədiyini və bu qərarın kredit portfelində pensiaçıların sayı çox olan banklara aid olduğunu deyib.

R.Aslanlı əlavə edib ki, problemli kreditlərin tərkibində ən həssas qrup olan pensiyaçıların orta aylıq gəliri 160 manat təşkil edir: “Onların ödədiyi aylıq ödənişlər isə 105 manat civarındadır. Belə olan halda pensiyaçının öz güzəranı sual doğurur. Bu o deməkdir ki, hər bir pensiyaçı hər ay qazancının təxminən 67-68 faizini borc müqabilində banka ödəməlidir, və 55 manatla özünü təmin eləməlidir. Artıq bəllidir ki, 55 manat insanın 1 ay ərzində yaşaması üçün yetərli deyil”.

R.Aslanlı bildirib ki, pensiyaçılar kreditləri çox vaxt özlərinin yox, yaxınlarının ehtiyacı üçün alırlar. Onlar isə ödəniş etmədikcə borc avtomatik olaraq pensiyaçının hesabından tutulur. Bu da onların sosial vəziyyətini pisləşdirir.