“Sədərək” və “ArazAvia” ticarət obyektlərində yenilik
16 mart 2011 18:02 (UTC +04:00)

“Sədərək” və “ArazAvia” ticarət obyektlərində yenilik

Bakı şəhərinin ən böyük ticarət mərkəzlərindən olan “Sədərək” və “ArazAvia” firmalarına məxsus ticarət obyektlərində sahibkarlıq fəaliyyətini həyata keçirən şəxslərə müvafiq izahatların verilməsi və onlara vergi qanunvericiliyi ilə bağlı köməkliklərin göstərilməsi məqsədilə Bakı Şəhər Vergilər Departamentinin Vergi Ödəyicilərinə Xidmət Terminalları yaradılıb.

Lent.az-ın Vergilər Nazirliyinin rəsmi saytına istinadən verdiyi məlumata görə, müraciət edən şəxslərə müvafiq xidmətlərin göstərilməsi məqsədilə terminallar bütün zəruri avadanlıqlarla təchiz olunmaqla, Bakı Şəhər Vergilər Departamentinin bir qrup əməkdaşı bu terminallara cəlb edilib.

Vergi ödəyicilərinə xidmət terminallarında sahibkarlıq fəaliyyətini ticarət mərkəzlərində həyata keçirən şəxslərə heç bir vergi orqanına getmədən vergi qanunvericiliyi, vergi öhdəlikləri və onların yerinə yetirilməsi müddətləri, həmçinin yeni sahibkarlıq fəaliyyətinə başlayan şəxslərə vergi ödəyicilərinin uçotu prosesləri barədə məlumatların verilməsi və eləcə də “fiziki şəxsin sahibkarlıq uçotu haqqında” ərizələrin qəbul edilməsi və onlara VÖEN verilməsi həyata keçirilir. Vergi orqanında uçota alınmaq üçün terminallara “fiziki şəxsin sahibkarlıq uçotu haqqında”" ərizə təqdim etmiş şəxslər bir gün ərzində vergi ödəyicisi kimi uçota alınır və onlara VÖEN verilir.

Son bir ay ərzində ticarət mərkəzlərində yaradılmış vergi ödəyicilərinə xidmət terminallarına sahibkarlıq fəaliyyəti ilə məşğul olan 900-ə yaxın şəxs müxtəlif məzmunlu məsələlərlə bağlı müraciət edib və vergi xidməti orqanı əməkdaşları tərəfindən onlara lazımi köməkliklər göstərilib. Müraciət edən şəxslərdən 700-ə yaxını vergi ödəyicisi kimi uçota alınaraq onlara VÖEN verilib.
# 1116

Oxşar yazılar