“Azərpoçt”un 170 məntəqəsi “Western Union” pulköçürmə sisteminə qoşulub
16 fevral 2011 14:02 (UTC +04:00)

“Azərpoçt”un 170 məntəqəsi “Western Union” pulköçürmə sisteminə qoşulub

Novruz bayramına qədər “Azərpoçt” ASC-nin 170 məntəqəsi “Western Union” pulköçürmə sisteminə qoşulacaq. Lent.az-ın məlumatına görə, Rabitə və İnformasiya Texnologiyaları Nazirliyinin dövlət müəssisələrinin fəaliyyətinin əlaqələndirilməsi şöbəsinin poçt sektorunun rəisi Novruz Məmmədov “Western Union”la əməkdaşlıq sazişinin imzalanması mərasimində belə deyib. Onun sözlərinə görə, hazırda 70-ə yaxın şöbə bu xidmətləri göstərir, Novruz bayramına qədər daha 100 şöbə sözügedən sistemə qoşulacaq.


Novruz Məmmədov deyib ki, “Western Union” vasitəsilə pulköçürmələr həm milli, həm də xarici valyutada aparılacaq. Onun sözlərinə görə, hazırda Azərbaycanda 45 bankın 600-ə yaxın məntəqəsi fəaliyyət göstərir: “Azərpoçt”un isə ölkə üzrə fəaliyyət göstərən 1600 məntəqəsindən on-line sistemə qoşulmuş 1200 məntəqəsi “Western Union” xidməti göstərəcək.


“Western Union”un Şərqi Avropa və MDB ölkələri üzrə regional vitse-prezidenti Conatan Knaus isə deyib ki, təmsil etdiyi şirkət 160 illik təcrübəyə malikdir. Onun sözlərinə görə, “Western Union” dünya üzrə 90 poçt müəssisəsi ilə əməkdaşlıq edir: “Şirkətimiz etibarlı və daha çox müştərilər üçün sərfəli olan xidmət göstərir. Ötən il “Western Union” üçün uğurlu olub. Dünya üzrə pulköçürmələrin 70 faizi “Western Union” vasitəsilə aparılıb. İnanıram ki, Azərbaycanda yeni tərəfdaşımızla imzaladığımız razılaşma üzrə əməkdaşlıq uzunmüddətli və hər iki tərəf üçün səmərəli olacaq”.

Elxan SALAHOV
# 1004

Oxşar yazılar