“Bakıelektrikşəbəkə” 11 əməkdaşını işdən qovub

Prezident Administrasiyasının rəhbəri Ramiz Mehdiyevin sədrliyi ilə Korrupsiyaya qarşı Mübarizə üzrə Komissiyanın yanvarın 27-də keçirilən iclasında verilmiş tapşırıqlardan irəli gələn vəzifələrə dair “Bakıelektrikşəbəkə” ASC-də iclas keçirilib. İclasda “Bakıelektrikşəbəkə”nin struktur bölmələrinin rəhbərləri iştirak ediblər.

Səhmdar Cəmiyyətdən Lent.az-a bildiriblər ki, “Bakıelektrikşəbəkə” ASC idarə heyətinin sədri Baba Rzayev çıxış edərək dövlət başçısının tapşırıqlarını toplantı iştirakçılarının diqqətinə çatdırıb. O, həmçinin mərkəzi və yerli strukturlarda abonentlərin haqlı narazılıqlarına səbəb olan mövcud mənfi halların aradan qaldırılması üçün ciddi tədbirlər görülməsi barədə göstərişlər verib.

İclasda bildirilib ki, abonentlərə göstərilən xidmətin keyfiyyətinin yüksəldilməsi, enerji istehlakçılarının şikayətləri üzrə operativ tədbirlərin görülməsi məqsədilə iş planı hazırlanıb. Həmçinin “Qaynar xətt”in təşkil edildiyi, mənfi hallarla bağlı olan şikayətlərə obyektiv baxılması və nöqsanlara yol vermiş hər bir əməkdaş barəsində qanunauyğun ölçü götürülməsi xüsusi vurğulanıb. Qeyd olunub ki, son bir ildə istehlakçıların şikayətləri əsasında əmək və xidmət intizamının pozulması hallarına yol vermiş 2 əməkdaş barəsində materiallar hüquq-mühafizə orqanlarına göndərilib, 11 nəfər tutduğu vəzifələrindən azad edilib, 184 əməkdaş barəsində əmək qanunvericiliyində nəzərdə tutulan digər intizam tənbehi tədbirləri görülüb.

Elxan SALAHOV