Şabalıd 11, fındıq 12, qoz isə 3 faizdən çox bahalaşıb

Dövlət Statistika Komitəsi 2010-cu ilin dekabr ayında kənd təsərrüfatında istehsalçı qiymətlərinin dəyişməsi vəziyyətini açıqlayıb.

Komitədən Lent.az-a verilən məlumata görə, dekabr ayında bitkiçilik və heyvandarlıq məhsullarının istehsalçı qiymətləri əvvəlki ayla müqayisədə 1,7 faiz bahalaşıb. Birillik və ikiillik bitkilərdən buğdanın istehsalçı qiymətləri 0,9 faiz, qarğıdalının 0,1 faiz, arpanın 6,1 faiz, kələmin 3,1 faiz, göyərtinin 5,3 faiz, xiyarın 0,4 faiz, qırmızı turpun 2,8 faiz, sarımsağın 0,4 faiz, göy soğanın 0,2 faiz, kartofun 2,2 faiz, quru otun 1,8 faiz, yoncanın istehsalçı qiymətləri 8,5 faiz artıb. Yaşıl paxlalı tərəvəzlərin istehsalçı qiymətləri isə 1,2 faiz ucuzlaşıb.

Çoxillik bitkilərdən xurmanın istehsalçı qiymətləri 1,0 faiz, narın 3,6 faiz, feyxoanın 2,0 faiz, əzgilin 1,9 faiz, naringinin 3,7 faiz, almanın 4,4 faiz, armudun 3,9 faiz, şabalıdın 11,2 faiz, fındığın 12,2 faiz, qozun istehsalçı qiymətləri 3,4 faiz bahalaşıb. Limonun 0,4 faiz, ağac və kol tinglərinin istehsalçı qiymətləri isə 0,2 faiz aşağı düşüb.

Diri heyvanlar və heyvandarlıq məhsullarından iri-buynuzlu mal-qaranın istehsalçı qiymətləri 0,7 faiz, inək südünün 0,1 faiz, camış südünün 2,0 faiz, quzunun 0,1 faiz, qoyun südünün 1,5 faiz, qoyun ətinin (diri çəkidə) 1,6 faiz, hind toyuğunun 1,8 faiz, yumurtanın 9,5 faiz, quş ətinin (diri çəkidə) 3,1 faiz, təbii balın qiymətləri 1,1 faiz bahalaşıb. Donuz ətinin (diri çəkidə) 6,7 faiz, diri qazların istehsalçı qiymətləri isə 2,7 faiz ucuzlaşıb.

Ötən ay ərzində meşə təsərrüfatı məhsullarından yanacaq oduncağının istehsalçı qiymətləri 0,2 faiz, balıq və sair balıqçılıq məhsullarından isə diri balığın qiymətlərində 0,8 faiz bahalaşma müşahidə olunub.

Elxan SALAHOV