“Onlar da hədiyyə gözləyirlər...”

“Azercell Telekom” MMC “Onlar da hədiyyə gözləyirlər...” adlı layihəyə start verir. Bununla da şirkət “Park Bulvar” alış-veriş mərkəzinin təmənnasız ayırdığı yerlərdə valideyn himayəsindən məhrum olan uşaqların “Yeni il arzuları”nı gerçəkləşdirmək niyyətindədir.

“Azercell Telekom” MMC-dən Lent.az-a verilən məlumata görə, bu layihəsinin unikallığı ondadır ki, istənilən şəxs valideyn himayəsindən məhrum uşaqların bayramına əvəzsiz töhfə verə bilər. Belə ki, uşaqlar üçün nəzərdə tutulan hədiyyələr hazırda “Park Bulvar” alış-veriş mərkəzinin birinci və ikinci mərtəbəsində yerləşdirilən 3 şam ağacından asılıb. Ağacların üzərindəki hədiyyələr təsadüfən seçilməyib. Şirkət əməkdaşları uşaqların hər birindən istədiyi hədiyyəni öyrənib, onları ağacın üzərindəki rəngarəng yeni il oyuncaqlarının üzərinə yerləşdiriblər. Beləliklə də, istənilən şəxs bir və ya bir neçə hədiyyəni alıb onu arzulayan uşağın özünə təqdim etmək imkanı əldə edir.

Hədiyyələrin təqdim edilməsi üçün “Azercell Telekom”un dəstəyi ilə dekabrın 28-də “Landmark”ın Rotunda zalında bir neçə uşaq evinin sakinləri üçün yeni il şənliyi keçiriləcək. Mərasimdə uşaqlara “Onlar da hədiyyə gözləyirlər...” layihəsi çərçivəsində arzuladıqları hədiyyələr paylanacaq. Bu təşəbbüsün məqsədi ana və ata qayğısından məhrum olmuş uşaqları məhz özlərinin istədiyi hədiyyələrlə sevindirmək və onlar üçün Yeni il bayramını unudulmaz bir şənliyə çevirməkdən ibarətdir.

Xatırladaq ki, “Onlar da hədiyyə gözləyirlər...” layihəsi dekabrın 26-dək keçiriləcək.