Azərbaycanda yeni SES tikilir

Yuxarı Şirvan kanalının Göyçay rayonunun Bığır kəndi ərazisindən keçən əlverişli və münasib hissəsində, gücü 3 MVt olan “Göyçay-1” SES-in inşasına başlanıb. Lent.az-ın “Azərenerji” ASC-nin rəsmi saytına istinadən verdiyi məlumata görə, stansiyada tikinti işlərini “AZENCO” ASC həyata keçirir.

Artıq əraziyə kifayət qədər maşın və mexanizm gətirilib, işçi qüvvəsi komplektləşdirilib. İnşaatçılar hazırda müxtəlif istiqamətlərdə iş aparırlar. Suqəbuledicinin şlüz hissəsində tikinti-quraşdırma işləri yerinə yetirilir. Obyektdə ikinövbəli iş rejimi tətbiq edilir. Buraya yeni transformator qoyulub, elektrik dirəkləri basdırılıb və tikinti ilk növbədə dayanıqlı elektrik enerjisi ilə təchiz edilib. İşçilərə gündə iki dəfə isti yemək verilir.

Yeri gəlmişkən, stansiyanın özülündə aparılacaq betontökmə işlərinə də hazırlıq görülür. İnşaatçılar zəruri torpaq işlərini görərək, stansiyanın ucaldılacağı yeri hazır vəziyyətə gətiriblər. Ərazidə suyun səviyyə fərqi on iki metr olacaq ki, bu da hidroaqreqatların mükəmməl işləməsinə şərait yaradacaq.

Qrunt sularının həddindən artıq çox olması işin sürətinə müəyyən qədər maneə törətsə də, inşaatçı-quraşdırıcılar obyekti nəzərdə tutulmuş vaxtda istifadəyə vermək üçün səylə çalışırlar.