Gələn il işçisini sığortalamayan təşkilatlar cərimələnəcək

Həmin təşkilatlar 1500 manat cərimə ödəyəcək

Gələn ilin yanvar ayından Azərbaycanda fəaliyyət göstərən müəssisə və təşkilatlar öz işçilərini «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə sığortalamadığı təqdirdə 1500 manat məbləğində cərimə olunacaq.

«APA-ECONOMICS»in məlumatına görə, bunu Əmək və Əhalinin Sosial Müdafiəsi Nazirliyi Dövlət Əmək Müfəttişliyinin rəis müavini Məhərrəm Məhərov bildirib.

M.Məhərovun sözlərinə görə, İnzibati Xətalar Məcəlləsinin 53.9-cu maddəsinə edilən dəyişikliyə əsasən, «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə işəgötürən işçinin sığortalanması ilə bağlı birbaşa məsuliyyət daşıyır.

M.Məhərov bildirib ki, hazırda Azərbaycanda 400 minə yaxın işəgötürən mövcuddur və bu müəssisə və təşkilatların hamısı işçilərini icbari qaydada sığortalamalıdır: «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında» qanunda hərbi və ya xüsusi rütbəsi olan şəxslər, Azərbaycan və Naxçıvan Milli Məclisinin deputatları, həmçinin «Sosial sığorta haqqında» qanuna uyğun olaraq, məcburi dövlət sosial sığortasına cəlb olunmayan əcnəbilər istisna olmaqla, bütün sosial sığorta haqqı ödəyən şəxslər bu sığorta növü üzrə sığortalanacaq».

M.Məhərov qeyd edib ki, tətbiq olunacaq cərimələr hüquqi şəxslərə, hüquqi şəxs yaratmadan sahibkarlıq fəaliyyəti ilə məşğul olan fiziki şəxslərə və xarici dövlətin hüquqi şəxs qismində yaradılan bütün müəssisələrinə şamil ediləcək.

Qeyd edək ki, qanunun icrasına nəzarəti Dövlət Əmək Müfəttişliyi, zonal Tibbi Sosial Ekspert Komissiyaları və Maliyyə Nazirliyinin Dövlət Sığorta Nəzarəti Xidməti həyata keçirəcək.

Xatırladaq ki, «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» qanunu 2010-cu il iyulun 3-də qüvvəyə minib. Qanun istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarının icbari sığorta sahəsində münasibətləri tənzimləyir, həmçinin bu münasibətlərin hüquqi, iqtisadi və təşkilatı əsaslarını müəyyən edir.