MSŞT haqqında qanun layihəsi hazırlanır

“Mədən Sənayesində Şəffaflıq Təşəbbüsü haqqında” qanunla bağlı ilk ictimai müzakirə aparılıb

Bu gün Mədən Sənayesində Şəffaflığın Artırılması Koalisiyasının təşkilatçılığı ilə “Mədən sənayesində şəffaflığın təmin edilməsinin qanunvericilik əsasları” mövzusunda konfrans keçirilib. Lent.az-ın məlumatına görə, tədbirdə MSŞT Koalisiyası Şurasının əlaqələndiricisi Sabit Bağırov çıxış edərək şəffaflıq təşəbbüsünün hüquqi bazasının yaradılmasının əhəmiyyətindən danışıb. O Azərbaycanda MSŞT-nin tətbiqi, əldə olunmuş nailiyyətlər və mövcud problemləri qeyd edib və bildirib ki, Koalisiya “Mədən Sənayesində Şəffaflıq Təşəbbüsü haqqında” qanun layihəsi hazırlayır.

Daha sonra Koalisiyanın Şura üzvü Sahib Məmmədovun mövzu ilə bağlı təqdimatla çıxış edib. Ekspert çıxışında MSŞT sahəsində mövcud vəziyyətin mənfi və müsbət aspektləri və digər ölkələrin təcrübəsindən bəhs edib. Tədbirdə “MSŞT Haqqında Qanunun qəbulu nəyi həll edə bilər” sualı ətrafında geniş təhlillər aparılıb.

Dövlət Neft Fondunun, Milli Bankın nümayəndələrinin, beynəlxalq təşkilatlar və media nümayəndələrinin iştirakı ilə keçirilən konfransda Zöhrab İsmayılov, İnqilab Əhmədov, Sevgim Rəhmanov, Qubad İbadoğlu, Əliməmməd Nuriyev, Fəridə Hüseynova da “Mədən Sənayesində Şəffaflıq Təşəbbüsü haqqında” qanuna ehtiyac yarandığını və bu sənəddə ən xırda məqamların nəzərə alınmalı olduğunu vurğulayıblar. Regionda belə bir qanunun olmadığına diqqət yönəldən mütəxəssislər onu da qeyd ediblər ki, hazırlanacaq qanun daha çox şəffaflıq məsələlərini özündə ehtiva etməli və daha uzaq perspektivlərə söykənməlidir.