11 ayda 47,1 milyon ton neft hasil olunub

2010-cu ilin 11 ayı ərzində Azərbaycanda sənaye sahəsində məhsul istehsalı ötən ilin yanvar-noyabr ayları ilə müqayisədə 3,1 faiz artıb.

Dövlət Statistika Komitəsindən Lent.az-a bildiriblər ki, sənaye məhsulunun 76,1 faizi (19,2 milyard manatı) mədənçıxarma bölməsində, 18,8 faizi (4,8 milyard manatı) emal bölməsində, 4,5 faizi (1,1 milyard manatı) elektrik enerjisi, qaz, buxar və kondisiyalaşdırılmış hava ilə təchizat bölməsində, 0,6 faizi (145,7 milyon manatı) su təchizatı, çirkli suların və tullantıların təmizlənməsi bölməsində istehsal olunub.

Yanvar-noyabr ayları ərzində mədənçıxarma bölməsində 47,1 milyon ton neft, 15,5 milyard kubmetr əmtəəlik qaz hasil olunub. Emal bölməsinin məhsullarından qida məhsulları istehsalı 2,2 faiz, içki istehsalı 12,7 faiz, mebeldən başqa ağacın emalı və ağacdan məmulatlar istehsalı 14,6 faiz, kağız və karton istehsalı 22,9 faiz, poliqrafiya fəaliyyəti və yazılmış məlumatların daşıyıcılara köçürülməsi 10,5 faiz, neft məhsulları istehsalı 8,9 faiz, kimya sənayesi məhsulları istehsalı 11,2 faiz, metallurgiya sənayesi məhsulları istehsalı 22,3 faiz, elektrik avadanlıqları istehsalı 83,2 faiz, maşın və avadanlıqlar istehsalı 2,6 dəfə, avtomobil, qoşqu və yarımqoşqular istehsalı 74,4 dəfə artıb.

Komitənin hesablamalarına görə, bu ilin əvvəlindən ölkənin elektrik stansiyalarında 16,0 milyard kilovat/saat elektrik enerjisi istehsal olunub. Sənaye məhsulu istehsalı neft sektorunda 2,5 faiz, qeyri-neft sektorunda isə 5,9 faiz artıb.

Elxan SALAHOV