Daşınmaz əmlakın vahid kadastrı yaradılır

Komitənin mətbuat xidmətindən Lent.az-a bildiriblər ki, daşınmaz əmlakın vahid kadastrına torpaq sahələri, bina, tikili, qurğu, yaşayış binaları, mənzillər, kommunikasiya obyektləri, meşə sahələri, sututarlar, əmlak kompleksləri haqqında zəruri mətn və qrafik məlumatları daxil ediləcək. Həmin məlumatlar prezidentin müvafiq fərmanı əsasında bələdiyyələrin xəritələrinin hazırlanması məqsədi ilə yerlərdə aparılan işlərdə istifadə olunacaq. Artıq ayrı-ayrı daşınmaz əmlak obyektləri üzrə kadastr aparan icra hakimiyyəti orqanlarından onlarda olan kadastr məlumatlarının, habelə daşınmaz əmlaka dair hüquqların qeydiyyatı ilə bağlı ərazi idarələrində aparılan kadastr işlərinə dair sənəd və məlumatların müəyyən edilmiş qaydada alınması, təhlil edilməsi və daşınmaz əmlakın vahid kadastr bazasına daxil edilməsi istiqamətində də tədbirlər görülüb.

Mətbuat xidmətində bildirirlər ki, Dünya Bankının Daşınmaz Əmlakın Qeydiyyatı Layihəsi çərçivəsində 4 milyon hektar ərazisini əhatə edən daşınmaz əmlakın rəqəmli kadastr xəritələrinin hazırlanması üçün texniki spesifikasiyalar və tələblər müəyyən edilib. Hazırda tender təkliflərinin qiymətləndirilməsi işləri aparılır və nəticəsindən asılı olaraq icra işlərinə başlanılacaq. Layihə çərçivəsində daşınmaz əmlakın rəqəmli kadastr xəritələrinin yaradılması üçün aero və kosmik çəkilişlər aparılmaqla ölkənin ərazisinin ortofoto xəritələri hazırlanıb.

Bundan başqa, daşınmaz əmlakın vahid dövlət kadastrı işlərinin aparılmasının dəstəklənməsi məqsədilə Gəncə və Şəki şəhərlərində kadastr və daşınmaz əmlakın qeydiyyatı sahəsində Almaniya təcrübəsi əsasında işlərin müasirləşdirilməsi təmin ediləcək. Belə ki, “Azərbaycan Respublikasının Əmlak Məsələləri Dövlət Komitəsi ilə KfW, Frankfurt am Main arasında “Kadastr və Daşınmaz Əmlakın Qeydiyyatı” layihəsinin həyata keçirilməsi üzrə Maliyyələşdirmə Müqaviləsi”nin – Konsepsiya Fazasının icrasına başlanıb. Almaniya Hökumətinin dəstəyi ilə iki mərhələdə aparılacaq işin nəticəsində Gəncə və Şəkinin daha mükəmməl kadastr və qeydiyyat sistemi qurulacaq.

Elxan SALAHOV