Brüsseldə MHŞT-nin iclası keçirilib

Belçikanın paytaxtı Brüssel şəhərində Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə Beynəlxalq İdarə Heyətinin iclası keçirilib.

Azərbaycan Respublikası Dövlət Neft Fondunun mətbuat xidmətindən Lent.az-a bildiriblər ki, iki gün davam edən iclasda Azərbaycan nümayəndə heyəti də iştirak edib. Nümayəndə heyətinə MHŞT üzrə hökumət Komissiyasının sədri, ARDNF-nin icraçı direktoru Şahmar Mövsümov rəhbərlik edib.

Xatırladaq ki, MHŞT xüsusi çoxtərəfli və şirkətlər, hökumətlər, sərmayəçilər və vətəndaş cəmiyyəti təşkilatları tərəfindən dəstəklənən könüllü təşəbbüsdür. MHŞT neft, qaz və mədən hasilatı sahəsində şəffaflığın təmin edilməsində qlobal standartdır. Azərbaycan MHŞT prosesinə 2003-cü ildə qoşulub. Azərbaycan MHŞT-nin qiymətləndirilməsi prosesindən keçən və MHŞT-nin tamhüquqlu üzvü statusunu alan ilk MHŞT ölkəsidir. MHŞT prinsip və meyarlarına tam cavab verən ölkə olması və MHŞT-nin tətbiqi sahəsində əldə etdiyi nailiyyətlərə görə Azərbaycana "2009-cu il MHŞT mükafatı" təqdim edilib.

Elxan SALAHOV