2 milyon ton taxıl, 953 min ton kartof yığılıb

Dekabrın 1-dək ölkənin kənd təsərrüfatı bölməsində qarğıdalı da daxil olmaqla 2000,3 min ton taxıl, 953,7 min ton kartof, 1178,9 min ton tərəvəz, 35,3 min ton pambıq, 711,0 min ton meyvə və giləmeyvə tədarük olunub.

Dövlət Statistika Komitəsindən Lent.az-a bildiriblər ki, artıq aqrar bölmədə bitkiçilik məhsullarının yığımı başa çatmaq üzrədir. Bu ilin 11 ayında 433,2 min ton bostan məhsulları, 123,4 min ton üzüm, 218,0 min ton şəkər çuğunduru, 3,2 min ton tütün, 530,5 ton yaşıl çay yarpağı toplanmış, diri çəkidə 303,2 min ton ət, 1400,9 min ton süd, 1081,8 milyon ədəd yumurta və 15,4 min ton yun istehsal olunub. Taxıl və kartof istisna olmaqla qalan bitkiçilik məhsullarının və heyvandarlıq məhsullarının istehsalı keçən illə müqayisədə artıb. Dəyər ifadəsində heyvandarlıq məhsulları istehsalı 7,1 faiz yüksəlib, bitkiçilik məhsulları istehsalı 9,0 faiz və kənd təsərrüfatının ümumi məhsulu 2,7 faiz azalıb.

2011-ci ilin məhsulu üçün 973,1 min hektar sahədə şum qaldırılıb, 836,3 min hektar sahədə dən üçün taxıl, o cümlədən 602,0 min hektar sahədə buğda, 234,2 min hektar sahədə arpa səpilib.

Elxan SALAHOV