Azərbaycan Çinə neft ixracı sahəsində ilk addımı atdı

Bu günlərdə ARDNŞ Prezidenti Rövnəq Abdullayevin rəhbərlik etdiyi nümayəndə heyəti Çin Xalq Respublikasına və Sinqapura səfər edib. Lent.az-ın ARDNŞ-in rəsmi saytına istinadən verdiyi məlumata görə, Çinə səfər çərçivəsində Pekin şəhərində ARDNŞ ilə bu ölkənin “Zhen Rong” şirkəti arasında ikitərəfli əməkdaşlıqla bağlı danışıqlar aparılıb, Azərbaycan mənşəli xam neftin Çin Xalq Respublikasına təchizatı üzrə Anlaşma Memorandumu imzalanıb.

Sinqapurda ADRNŞ nümayəndə heyəti ilə Tailandın PTT şirkətinin nümayəndələri arasında da görüş keçirilib. Görüş zamanı tərəflər ötən 5 il müddətində aparılmış ikitərəfli əməkdaşlığın nəticələrini müzakirə edib, qarşıdakı dövr üçün perspektivləri dəyərləndiriblər. Danışıqların yekunu kimi tərəflər arasında Sinqapur yaxınlığında PTT şirkətinə məxsus “üzən neft anbarı”nın birgə istifadəsi barədə Memorandum imzalanıb. Bu Memorandumun həyata keçirilməsi Azərbaycan neftinin Asiya bazarına ixracının diversifikasiya olunmasına imkan verəcək və beləliklə, Azərbaycan neftinin ixracının səmərəliliyinin artırılmasına xidmət göstərəcək.