4 heyvandarlıq kompleksi yaradılacaq
11 dekabr 2010 11:33 (UTC +04:00)

4 heyvandarlıq kompleksi yaradılacaq

2010-cu ilin ötən dövründə Sahibkarlığa Kömək Milli Fondu tərəfindən 4650 başlıq cins iribuynuzlu heyvandarlıq kompleksinin yaradılması məqsədilə 4 investisiya layihəsi maliyyələşdirilib. Artıq Ağdamda 450 başlıq müasir cins heyvandarlıq kompleksi istifadəyə verilib.

İqtisadi İnkişaf Nazirliyindən Lent.az-a bildiriblər ki, həmin kompleks Ağdam rayonunun Əfətli kəndində “Qara inək fermer təsərrüfatı” MMC tərəfindən inşa edilib. Digər 3 heyvandarlıq kompleksində aparılan işlərin 2011-ci ilin I yarısında başa çatdırılması nəzərdə tutulur.

Nazirlikdə deyirlər ki, sahibkarlıq subyektləri təqdim etdikləri layihələrdə fonddan ümumilikdə 11,9 milyon manat vəsait istəyiblər. Sahibkarlığa Kömək Milli Fondu isə həmin layihələrin güzəştli qaydada maliyyələşdirilməsi barədə qərar qəbul edib və Ağdam rayonunda yaradılan fermer təsərrüfatı 4 layihədən birincisidir. Kompleksin inşasında Almaniyanın “West Falia” şirkətinin istehsalı olan müasir avadanlıq və texnologiyadan istifadə olunub. Həmçinin, bu ölkədən 200 baş südlük istiqamətli cins “holşteyn-friz” cinsindən olan inəklər gətirilib. Bu inəklər yüksək məhsuldarlığa malik olmaqla laktasiya dövründə (305 gün ərzində) 7000-7500 litr (23-24,5 litr) südvermə qabiliyyətinə malikdir.

Əsas hissəsi güzəştli kreditlər hesabına olmaqla yaradılacaq digər 3 heyvandarlıq kompleksində isə tikinti işlərinin 2011-ci ilin I yarısında başa çatdırılması nəzərdə tutulur. Nazirlikdə hesab edirlər ki, bu cür heyvandarlıq komplekslərinin yaradılması əhalinin yüksək keyfiyyətli, sanitar-gigiyenik tələblərə cavab verən, ekoloji cəhətdən təmiz süd və süd məhsulları ilə təminatında əhəmiyyətli rol oynayacaq.

Elxan SALAHOV
# 1244

Oxşar yazılar