“Azərenerji” qışa hazırlaşır

“Bakı İstilik Elektrik Mərkəzi”nin (İEM) 2010/2011-ci illərin payız-qış mövsümünə hazırlıq tədbirlərini demək olar ki, başa çatdırıb.

“Azərenerji” ASC-nin mətbuat xidmətindən Lent.az-a bildiriblər ki, respublikanın elektrik enerjisi sistemində, o cümlədən İEM-də qışa hazırlıq yüksək səviyyədə həyata keçirilib. Belə ki, 16 saylı buxar qazanı əsaslı təmir olunub, 1 və 2 saylı boylerin qızma səthləri təmizlənib və təzyiq atlında yoxlanılıb. İstilik şəbəkə sistemində gedən-qayıdan və əlavə bəsləmə xətlərindəki sərfölçmə qovşaqları təftiş olunub və möhürlənib. 1-4 və 3-7 saylı şəbəkə nasosları armaturlarla birlikdə təmir olunub. Bundan başqa, boyler qurğusundakı 1-3 saylı kondensat nasosları da təmir edilib.

Qışa hazırlıq tədbirləri çərçivəsində 6 saylı 6/35/110 kilovoltluq yarımstansiyadakı 110, 6 və 35 kilovoltluq yağ açarları əsaslı təmir edilib. 35 kilovoltluq 1, 7 və 9 saylı hava xətlərinin yağ açarlarında isə cari təmir işləri görülüb. Stansiyadakı 80 meqavatlıq 6 saylı transformator, eləcə də 110 kilovoltluq yarımstansiyadakı 8 ədəd yağ açarı əsaslı təmir olunub.

Xatırladaq ki, bu gün Azərbaycanda energetiklərin peşə bayramıdır.

Elxan SALAHOV