Ünvan reyestrinin yaradılması reallaşır

Əmlak Məsələləri Dövlət Komitəsi Almaniya Texniki Əməkdaşlıq Cəmiyyətinin (GTZ) dəstəyi ilə Qubada “Daşınmaz Əmlakın Kadastrı və Qeydiyyatı” mövzusunda seminar keçirib. Tədbirdə Daşınmaz Əmlakın Dövlət Reyestri Xidmətinin müvafiq regional ərazi idarələrinin əməkdaşları iştirak ediblər.

Əmlak Məsələləri Dövlət Komitəsinin mətbuat xidmətindən Lent.az-a bildiriblər ki, seminarda GTZ-nin layihə rəhbəri cənab Vulf Şmider daşınmaz əmlakın qeydiyyatı və kadastrı ilə bağlı müxtəlif mövzularda çıxış edib. O, Avropanın inkişaf etmiş ölkələrində, o cümlədən Almaniyada daşınmaz əmlakın qeydiyyatı sisteminin yaranma tarixi, daşınmaz əmlak qeydiyyatının qaydaları və onun aparılması, bu sahədə əldə edilmiş nailiyyətlər və tətbiq edilən yeniliklərdən danışıb.

Seminarda həmçinin ayrı-ayrı ölkələrin təcrübələri əsasında daşınmaz əmlakın vahid kadastrının yaradılmasının əsas məqsədləri, kadastra daxil olan komponentlər, kadastr məlumatlarından istifadə qaydaları və istiqamətləri, kadastrın hazırlanması və aparılması texnologiyalarının təkmilləşdirilməsinin əsas istiqamətləri və digər məsələlər müzakirə edilib.

Əmlak Məsələləri Dövlət Komitəsi tərəfindən vahid kadastrın tərkib hissəsi kimi “Almaniyada daşınmaz əmlakın ünvan qeydiyyatı” mövzusunda da növbəti seminar keçirilib. Tədbirdə Almaniya Federativ Respublikasında daşınmaz əmlak obyektlərinin ünvan qeydiyyatının aparılması qaydaları, ünvanlarla bağlı əsas məlumat mənbələri haqqında ətraflı məlumat verilib. Seminarın gedişində ölkəmizdə daşınmaz əmlak obyektlərinə ünvanların verilməsinin təkmilləşdirilməsi zamanı Almaniyada toplanılmış təcrübədən yararlanmaq imkanları barədə fikir mübadiləsi aparılıb.

Hər iki seminarın sonunda iştirakçılara sertifikatlar paylanıb.

Elxan SALAHOV