Topaz Premyer Liqası: Son vəsiqənin sahibi məlum oldu – NƏTİCƏLƏR, TURNİR CƏDVƏLİ

Futbol üzrə Topaz Premyer Liqasında təsnifat mərhələsinə yekun vurulub. Lent.az-ın məlumatına görə, XXII turda ilk “6-lığ”a vəsiqəni təmin edən sonuncu komandanın adına aydınlıq gəlib.

“Bakı” klubu evdə “Rəvan”ı 2:1 hesabı ilə yenərək, mükafatlar uğrunda mübarizə hüququ qazanıb. Paytaxt derbisində hesabı qonaqlar açsa da, “Bakı” yeni transferi Marius Penanın “dubl”u sayəsində qalib gəlib. Bu nəticədən sonra 6-cı yerə iddialı digər 2 komanda – “Xəzər Lənkəran”la AZAL-ın müvafiq olaraq, “Sumqayıt” və “Qəbələ” ilə görüşlərdə nəticələri əhəmiyyətini itirib. Hərçənd bu oyunlar kifayət qədər məhsuldar alınıb. “Xəzər Lənkəran” Robert Alvizin penaltilərlə “dubl”u sayəsində məğlubiyyətdən yaxa qurtara bilib. AZAL-a isə 6:1 hesablı darmadağın da kömək edə bilməyib.

“Neftçi” “Turan”ı minimal fərqlə yenərək, liderliyini möhkəmlədib. Flaqman turun mərkəzi görüşündə “Qarabağ”la “İnter”in qolsuz bərabərliyindən sonra ən yaxın izləyicisi ilə xal fərqini 3-ə çatdırıb. Autsayder “Kəpəz” isə ardıcıl 9 turluq məğlubiyyətdən sonra xal qazanmağı bacarıb. Gəncə təmsilçisi “Simurq”la qarşılaşmada heç-heçəyə nail olub.

3 mart (bazar)

“Kəpəz” (Gəncə) – “Simurq” (Zaqatala) – 1:1
Qollar: Şahin Kərimov, 11 - Mario Bojiç, 53

“Bakı” – “Rəvan” (Bakı) – 2:1
Qollar: Marius Pena, 19; 57 - Şəhriyar Rəhimov, 12

“Xəzər Lənkəran” – “Sumqayıt” - 2:2
Qollar: Robert Alviz, 14; 66 – hər ikisi penalti ilə - Mirzəağa Hüseynpur, 4. Orxan Əliyev, 47

AZAL (Bakı) – “Qəbələ” – 6:1
Qollar: Viktor İqbekoyi, 17. Cavid Tağıyev, 47; 60. Branislav Arsenyeviç, 71. Zohair Benouahi, 77. Con Olufemi, 90+3 - Mustafa Dabo, 12

Qırmızı vərəqə: Vurğun Hüseynov, 83 (“Qəbələ”)

“Turan” (Tovuz) – “Neftçi” (Bakı) – 2:3

Qollar: İrakli Beraya, 35. Ender Günlü, 84 - Flavinyo, 11. Araz Abdullayev, 61. Cavid İmamverdiyev, 75
İstifadə olunmamış penalti: Bahodir Nasimov, 86 (“Neftçi”)

“Qarabağ” (Ağdam) – “İnter” (Bakı) – 0:0

Turnir cədvəli:

N	Komandalar	O	Q	H	M	T	X
1	Neftçi	22	14	2	6	47-24	44
2.	İnter	22	11	8	3	24-12	41
3.	Qarabağ	22	10	9	3	30-19	39
4.	Simurq	22	9	9	4	25-15	36
5.	Qəbələ	22	9	5	8	26-27	32
6.	Bakı	22	6	12	4	24-15	30
7.	AZAL	22	7	8	7	32-25	29
8.	Xəzər Lənkəran	22	7	7	8	32-27	28
9.	Turan	22	6	5	11	24-35	23
10.	Sumqayıt	22	5	7	10	20-39	22
11.	Rəvan	22	6	4	12	23-36	22
12.	Kəpəz	22	2	4	16	12-45	10