Prosineçki yenilədi

Azərbaycan millisi 2007-ci aprelində imza atdığı rekordu yeniləyib. Apasport.az saytının məlumatına görə, aprel üçün açıqlanan FİFA reytinqində 24 pillə irəliləyən yığmamız 8 il əvvəl qeydə alınan 20 mövqelik sıçrayışını da kölgədə qoyub.

Həmin vaxt 123-cü yerdən 103-ə yüksələn Şahin Diniyevin baş məşqçisi olduğu komandamız Finlandiya üzərində qələbə (1:0) sayəsində irəliləmişdi. İndi isə Robert Prosineçkinin yetirmələri AVRO-2016-nın seçmə oyununda Maltanı 2 cavabsız qolla məyus edib, 139-cu yerdən 115-ə qədər qalxa bilib.

2013-cü ilin oktyabrında Şimali İrlandiya (2:0) və Rusiyadan (1:1) alınan 4 xal Berti Foqtsun yetirmələrinin 107-ci yerdən 88-ciyə qədər irəliləməsinə, yəni tariximizdə 3-cü göstərici olan 19 pilləlik inkişafa sevinməsi ilə nəticələnmişdi. Eyni nəticə 1994-cü ilin sentyabrında da qeydə alınmışdı. Onda 170-dən 151-ə qədər yüksəlmişdi.

Bu 4 böyük addımdan başqa, yığmamız 1 dəfə 15 (2011-ci ilin sentyabrı), 2 dəfə 14 (1998-ci ilin iyulu, 2009-cu ilin oktyabrı), 2 dəfə də 12 (1996-cı il aprel və sentyabrı) pilləlik sıçrayışımız qeydə alınıb.

Qeyd edək ki, Azərbaycan millisi ilk dəfə 1992-ci ilin dekabrında açıqlanan FİFA reytinqində təxminən ilyarım sonra peyda olub. 1994-cü ilin iyununda dünya sıralamasına daxil olan komandamızın adı indiyədək 239 dəfə açıqlanan siyahıya düşüb.