Mustafa Dənizli: “Finala vəsiqə şanslarımızı itirməmişik”

“Bu cür oyunu gözləmirdim. Məğlub olduq”. Lent.az-ın məlumatına görə, bunu “Xəzər Lənkəran” klubunun baş məşqçisi Mustafa Dənizli “Qəbələ” ilə futbol üzrə Azərbaycan Kubokunun ilk yarımfinal matçından sonra deyib.

0:3 hesablı məğlubiyyətə baxmayaraq, türkiyəli mütəxəssisin fikrincə, cavab qarşılaşması Azərbaycan kuboku tarixində ən vacib oyunlardan biri olacaq: “İlk oyunda məğlub olsaq da, finala çıxmaq şansımızı itirməmişik. Bir həftədən sonra keçiriləcək cavab qarşılaşmasının necə nəticələnəcəyi hamımız görəcəyik. Hamı cavab oyununu gözləsin. 0:3 ağır hesabdır. Son sözümüzü söyləməmişik”.

“Qəbələ”nin baş məşqçisi Yuri Syomin isə çox yaxşı nəticəyə imza atdıqlarını söyləsə də, qarşıda hələ cavab oyununun olduğunu xatırladıb: “Oyunun müəyyən hissələrində çox yaxşı oynadıq. Xüsusən də qol vurduğumuz epizodlarda. İlk hissədə müdafiədə dəqiq oynadıq, lakin hücumda oyunumuz alınmırdı. İkinci hissədə isə həm müdafiədə, həm də hücumda oyunumuz yaxşı alındı. Qarşıdakı cavab oyununa da ciddi yanaşmalıyıq. Artıq çempionatdakı oyunumuza hazırlaşacağıq. “Qarabağ”la kubok oyunundan sonra 4 müdafiəçimiz zədələndi. Bu, futbolda nadir rast gəlinən hallardan biridir. Ardıcıl məğlub olduğumuz oyunlar oldu. Lakin biz işimizi davam etdirdik, vəziyyəti düzəldəcəyimizə inanırdıq. Komanda məşqlərini davam etdirirdi, futbolçularıma bu baxımdan iradım yoxdur. Psixoloji cəhətdən isə vəziyyətimiz yaxşı deyildi”.

Rusiyalı mütəxəssis “Qəbələ” azarkeşlərinə də müraciət edib: “Azarkeşlərimizə üzümü tutub deyirəm ki, səbrli olsunlar və qalib gələndə də, məğlub olanda da bizi dəstəkləsinlər”.

Qeyd edək ki, yarımfinal mərhələsinin cavab görüşü aprelin 24-də olacaq.