Klublarımızın ev və səfər oyunlarının başlama vaxtı bəlli oldu

Ölkəmizi UEFA Avropa Liqasında təmsil edən “Qəbələ” və “İnter”in II təsnifat mərhələsindəki ilk oyunlarının vaxtları açıqlanıb.

Apasport.az-ın UEFA-nın rəsmi saytına istinadən məlumatına görə, hər iki təmsilçimiz ilk oyunlarını səfərdə keçirəcək.

İyulun 16-da ilk öncə “Qəbələ” meydana çıxacaq. Serbiyanın paytaxtı Belqradda “Çukariçki”yə qonaq olacaq təmsilçimizin oyunu Bakı vaxtı ilə saat 23:30-da başlayacaq.

“İnter”in matçı isə təxminən yarım saat sonra başlayacaq. “Bankirlər” eyni gündə, Bakı vaxtı ilə saat 00:15-də meydana çıxacaq. Paytaxt klubu İslandiyada “Hafnarfyordur”un qonağı olacaq. Oyun “Kaplakrikavöllur” stadionunda keçiriləcək.

Qeyd edək ki, təmsilçilərimizin cavab oyunları bir həftə sonra, iyulun 23-də keçiriləcək.

Hər iki klubumuzun oyunu saat 21:00-da başlayacaq. “İnter” rəqibini “İnter Arena”da, “Qəbələ” isə Qəbələ şəhər stadionunda qəbul edəcək.