Blatter beşinci dəfə FİFA prezidenti seçilmək istəyir

FİFA prezidenti Yozef Blatter təşkilatın növbəti rəhbəri seçkisində iştirak etməyə hazırlaşır.

Apasport.az saytının məlumatına görə, 78 yaşlı Blatter İsveçrənin “Blick” jurnalına müsahibəsində FİFA prezidenti kimi missiyasının başa çatmadığını bildirib.

Blatter bəyan edib ki, iyun-iyul aylarında Braziliyada keçiriləcək dünya çempionatını səbirsizliklə gözləyir. İsveçrəli futbol məmurunun sözlərinə görə, bu turnir onun iştirak ediyi 10-cu turnir olacaq.

FİFA prezidenti seçkisi 2015-ci ilin mayında keçiriləcək. Bundan əvvəl FİFA baş katibinin müavini Jerom Şampan da seçkidə iştirak etmək istədiyini bildirmişdi. Bundan əlavə UEFA prezidenti Mişel Platininin də prezident seçkisində iştirak edəcəyi gözlənilir.

Yozef Blatter 4 dəfə FİFA prezidenti postuna seçilib. O, ilk dəfə bu posta 1998-ci ildə gəlib. İkinci dəfə 2002-ci ildə seçkisində qalib gəlib. 2007-ci ildə üçüncü, 2011-ci ildə dördüncü dəfə qalib olub.