Baş məşqçi Azərbaycanı fantastik ölkə adlandırdı

İspaniyanın “Atletiko” futbol klubunun heyəti Bakı səfərindən razı qalıb. Lent.az-ın məlumatına görə, bu barədə komandanın baş məşqçisi Dieqo Simeone “Deportivo” ilə İspaniya çempionatında keçirəcəkləri növbəti tur matçı öncəsi açıqlama verib.

Argentinalı mütəxəssis bildirib ki, ötən tur “Real Madrid”ə 1:2 hesablı məğlubiyyətdən sonra Azərbaycan paytaxtında keçirdikləri iki gün komandanın əhval-ruhiyyəsinə müsbət təsir göstərib: “Biz fövqəladə sürətlə inkişaf edən fantastik ölkədə olduq. Bu səfər bizə ünsiyyətdə olmaq və bəzi futbolçularımızı sınaqdan keçirərək, heyətdə rəqabət yaratmaqda kömək etdi”.

“Atletiko”nun rəsmi saytı isə Bakı səfəri ilə bağlı videoxronika yayıb.

Qeyd edək ki, “Atletiko” klubu Bakının görməli yerləri ilə tanışlıqdan sonra eyniadlı komanda ilə yoldaşlıq görüşü keçirib. Oyun Madrid təmsilçisinin böyük hesablı qələbəsi ilə yekunlaşıb – 3:0. “Deportivo” ilə görüş mayın 4-də keçiriləcək.