Rusiyanın “Zenit” futbol klubunun yeni baş məşqçisi Andre Villaş-Boaş olacaq. Lent.az-ın klubun rəsmi saytına istinadən məlumatına görə, portuqaliyalı mütəxəssislə müqavilə martın 20-də bağlanılacaq.
36 yaşlı baş məşqçi komandaya 2015-2016-cı il mövsümünün sonunadək rəhbərlik edəcək. Villaş-Boaş yeni vəzifəsinin icrasına “Zenit”in Almaniyanın “Borussiya” (Dortmund) komandası ilə martın 19-da keçirəcəyi Çempionlar Liqasının 1/8 final mərhələsinin cavab görüşündən sonra başlayacaq. Bu oyuna isə Sankt-Peterburq təmsilçisini Sergey Semak çıxaracaq.
Qeyd edək ki, “Zenit”in əvvəlki baş məşqçisi Luçano Spaletti martın 11-də istefaya göndərilib. Andre Villaş-Boaş isə 2013-cü ilin dekabrında İngiltərə “Tottenhem”inin sükanı arxasından kənarlaşdırılıb. O, əvvəllər İngiltərənin “Çelsi”, Portuqaliyanın “Portu” və “Akademika” komandalarına da rəhbərlik edib. Gənc mütəxəssis “Portu”ya 2011-ci ildə Avropa Liqasını qazandırıb.