“Şahin” Braziliyanın qələbə qazanacağını proqnozlaşdırıb

Futbol üzrə dünya birinciliyində oyunların proqnozunu heyvanlardan «öyrənmək» adət halına alıb.

Lent.az-ın məlumatına görə, Braziliyada Futbol üzrə Dünya Kuboku yarışlarında hər oyundan qabaq bütün diqqət “dubaylı” Sahinə yönəlir. O, oyunda kimin qalib gələcəyini bildirir.

İyunun 17-dəki Braziliya-Meksika oyununda Şahin qələbəni Braziliyaya verib.

Sahin dəvənin adıdır. O, Dubayda səhrada yaşayır.

Sahin indiyə kimi Braziliya-Xorvatiya, Hollandiya-İspaniya, İtaliya-İngiltərə, Argentiona-Bosniya oyunlarının qalibini asanlıqla tapıb. Bircə Almaniya-Portuqaliya oyununda səhv edib. Sahin üstündə yığmaların adı olan iki lövhədən birini yıxır və bununla da kimin qalib gələcəyini göstərir. Heç birinə toxunmasa, heç-heçə deməkdir.

2014-cü ilin dünya kuboku oyunlarının nəticəsini əvvəlcədən bildirən Nelly adlı fil, Roo adlı köpək, Flopsy adlı kenquru, Yekəbaş adlı tısbağa var, ancaq onlar arasında Almaniya-Portuqaliya oyununa qədər səhvsiz proqnoz verən təkcə Sahin olub.