“Neftçi” uduzdu, “Qarabağ”ın çempionluq şansı daha da yüksəldi - YENİLƏNİB

Futbol üzrə Topaz Premyer Liqasında XXX tur 3 heç-heçə ilə start götürüb. Lent.az-ın məlumatına görə, “Qəbələ” sonuncu dəfə 8 tur öncə səfərdə 2:1 hesabı ilə qalib gəldiyi AZAL-ın bu dəfə müqavimətini qıra bilməyib.

Görüş qolsuz heç-heçə ilə yekunlaşıb. Bununla da baş məşqçi Yuri Syominin komandası 45 xalla 5-ci pillədə qalıb və çempionluq şanslarını tam itirib. “Təyyarəçilər” isə yeni baş məşqçi Tərlan Əhmədovun rəhbərliyi altında 4-cü matçda ilk dəfə meydanı xalla tərk ediblər. Bununla belə, AZAL 27 xalla 8-ci pillədə qalıb.

Autsayder “Sumqayıt” evdə “Simurq”la heç-heçəyə nail olub. Zaqatala komandası ikinci hissənin ortalarında hesabı açsa da, meydan sahibləri tezliklə bərabərlik qolunu vurublar. Bununla da “Sumqayıt” xallarını 18-ə çatdıraraq, özündən əvvəlki – 9-cu pillədə olan “Rəvan”la bərabərləşib.

“Bakı” – “Xəzər Lənkəran” matçı isə daha məhsuldar alınıb. Qonaq komanda ilk yarını 2:0 hesablı üstünlüklə tamamlayıb. Fasilədən sonra isə baş hakim Ramil Diniyev “Xəzər Lənkəran”ın qapısına 2 penalti təyin edib. Hər iki zərbəni Əfran İsmayılov dəqiq yerinə yetirib. Qonaqlar oyunun son 1/3-ini Adrian Skarlatakenin qovulması üzündən azlıqda keçirməli olublar.

“Şəfa” stadionunda keçirilən “İnter” – “Neftçi” matçında meydan sahibləri qalib gəlib – 2:1. Hər 3 qol ikinci yarıda vurulub. “Bankirlər”in heyətində Matiya Şpiçiç “dubl” edib. “Neftçi”nin yeganə qolunun müəllifi isə müdafiəçi Elvin Yunuszadə olub. Bununla da “Neftçi” ardıcıl 5 qələbənin ardından məğlubiyyətlə üzləşib. “İnter” isə “Neftçi” ilə xallarını bərabərləşdirərək, şəxsi oyunlardakı üstünlüyü sayəsində 54 xalla 2-ci pilləyə yüksəlib.

“Neftçi”nin məğlubiyyəti lider “Qarabağ”ın çempionluq şanslarını daha da artırıb. Ağdam komandası hazırda davam edən görüşdə “Rəvan”ı məğlub etsə, sona 6 tur qalmış ən yaxın izləyicisi ilə xal fərqini 13-ə çatdıracaq. Hələlik Tofiq Bəhramov adına Respublika stadionunda keçirilən matçda meydan sahibləri öndədir – 1:0.

12 aprel (şənbə)

“Bakı” – “Xəzər Lənkəran” – 2:2

Qollar: Əfran İsmayılov, 48; 63 (hər ikisi penalti ilə) – Junior Nildo, 5. Elias Ribeyro, 28

“Sumqayıt” – “Simurq” (Zaqatala) – 1:1

Qollar: Rəhman Hacıyev, 71 – Draqan Çeran, 69

15:00. “Qəbələ” – AZAL (Bakı) – 0:0

17:00. “İnter” (Bakı) – “Neftçi” (Bakı) – 2:1

Qollar: Matiya Şpiçiç, 47; 65 – Elvin Yunuszadə, 60

18:30. “Qarabağ” (Ağdam) – “Rəvan” (Bakı) – 1:0 (ilk yarı)

Qol: Leroy Corc, 34