“Qarabağ” və “Xəzər Lənkəran” cəzalandırıldı

AFFA-nın İntizam Komitəsi (İK) XXIII Topaz Premyer Liqasının IV turunda qeydə alınan qayda pozuntuları ilə bağlı qərarlarını açıqlayıb. Apasport.az saytının məlumatına görə, “İnter Arena”da keçirilən “Qarabağ” – “Bakı” matçında nominal meydan sahiblərinin 4 futbolçusu sarı vərəqə ilə cəzalandığı üçün klub 1000 manat cərimə olunub.

Eyni hal AZAL-ın da başına gəlib. Belə ki, “təyyarəçilər” “Qəbələ”yə qalib gəldikləri səfər matçında 6 futbolçusunun sarı vərəqə almasına görə 1000 manat AFFA-nın “xəzinə”sinə keçirməlidir. Üstəlik, həmin oyunun 90+3-cü dəqiqəsində AZAL-ın braziliyalı futbolçusu Eduardo idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb. Klub isə yeni transferinə görə əlavə 200 manat da cərimə ödəməlidir.

“Sumqayıt” – “Araz Naxçıvan” matçında muxtar respublika təmsilçisinin 4 futbolçusu sarı vərəqə ilə cəzalandığı üçün klub 1000 manatından keçməlidir. Oyunun 52-ci dəqiqəsində “Sumqayıt”ın müdafiəçisi Vurğun Hüseynov idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün futbolçu 1 oyunluq cəzalanıb. Meydan sahibləri Vurğuna görə 200 manat cərimələnib.

4 futbolçusu sarı vərəqə aldığı üçün 1000 manat miqdarında cərimə olunan növbəti komanda isə “Xəzər Lənkəran” olub. Cənublular bu vərəqələri “İnter”ə qalib gəldikləri matçda baş hakim tərəfindən görüb.