Messi Ronaldonu ən yaxşı futbolçu hesab edir

Argentina yığmasının və “İnter Mayami” klubunun əfsanəvi futbolçusu, səkkiz qat “Qızıl top” mükafatının sahibi Lionel Messi ən yaxşı futbolçunun adını açıqlayıb.

Lent.az xəbər verir ki, o, braziliyalı Ronaldonu ən yaxşı futbolçu hesab edib:

“Ronaldo fenomen idi. Gördüyüm bütün oyunçular arasında o, mənim üçün ən yaxşısı idi. Necə baxırsan bax, heyrətamiz oyunçudur”.

Xatırladaq ki, Ronaldo inanılmaz sürəti, texnikası və hücumlarını bitirməsi ilə tanınıb. O, karyerasına “Kruzeyro”da başlayıb, sonra PSV, “Barselona”, “İnter”, “Real Madrid” və “Milan”da çıxış edib.

Ronaldo iki dəfə “Qızıl top”u (1997, 2002) və iki dəfə də Dünya Kubokunu (1994, 2002) qazanıb. 2002-ci ildə o, turnirin bombardiri olub və Braziliyanın qələbəsində mühüm rol oynayıb. Həm də Amerika Kubokunu və Konfederasiyalar Kubokunu qazanıb.

Xüsusilə hücumda özünəməxsus oyun tərzi ilə tanınıb, burada inanılmaz texnika, dribling və intuisiya olub. Onun karyerası 2011-ci ildə başa çatıb.