ŞOK! “Xəzər Lənkəran” legionerləri ilə vidalaşdı

Lent.az-ın klubun rəsmi saytına istinadən verdiyi məlumata görə, iclasda növbəti mövsüm üçün klubun strategiyası və planları təyin olunub. Müzakirələrin nəticəsində klubun gələcəyinin yerli gənc futbolçularla bağlanması daha məqsədəuyğun hesab edilib. Bununla əlaqədar klub legioner və bir sıra yerli futbolçularla yollarını ayırmaq qərarına gəlib. Lakin onların adları açıqlanmır.

Qərara əsasən legionerlərə xərclənən vəsait bundan sonra gənc futbolçuların yetişdirilməsinə, aşağı yaş qruplarının təkmilləşməsinə yönəldiləcək ki, bunun da məqsədi “Xəzər Lənkəran”ın gələcəyinə və yerli futbolçuların inkişafına daha böyük töhfə verməkdir.

Klub rəhbərliyi bu strategiyanı yeganə doğru yol hesab edərək inanır ki, atılan bu addım “Xəzər Lənkəran”ın və Azərbaycan futbolunun ümumi inkişafına öz töhfəsini verəcək və sadiq azarkeşlər tərəfindən düzgün qarşılanacaq.

Qeyd edək ki, “Xəzər Lənkəran” “Makkabi” ilə cavab görüşündə heç-heçə edib – 0:0. Lakin ilk görüşdə 1:3 hesabı ilə uduzan Lənkəran təmsilçisi mübarizəni dayandırıb.