“Real Madrid” futbol tarixində ikinci ən bahalı müdafiəçi transfer etdi

Lent.az-ın məlumatına görə, “kral klubu” Portuqaliya “Benfika”sının 23 yaşlı oyunçusu Fabio Koentraunu 30 milyon avroya alıb.

Artıq tibbi müayinədən keçən Koentrau ilə 6 illik müqavilə bağlanılıb. O, “Real Madrid”in mövsümlərarası fasilə müddətində 5-ci transferi olub. Əvvəllər madridlilər türk əsilli futbolçular Nuri Şahin və Hamit Altıntop, ispaniyalı Xose Kalyexon və fransalı Rafael Varanla gücləniblər.

Qeyd edək ki, Fabio Koentrau “Benfika”ya 2007-ci ildə “Riu Ave” klubundan keçib. 23 yaşlı müdafiəçi bir neçə klubda icarə əsasında çıxış etdikdən sonra Lissabon komandasında sol cinah kimi möhkəmlənməyi bacarıb. O, “Benfika”ya 2010-cu ildə Portuqaliya çempionluğunu, 2011-ci ildə isə ölkə kubokunu qazanmaqda kömək edib. Portuqaliya yığmasında 2009-cu ildə debüt edən Koentrau 2010-cu il dünya çempionatında millinin matçlarını əvəzlənmədən keçirib.

Qeyd edək ki, futbol tarixində ən bahalı müdafiəçi Rio Ferdinand sayılır. O, 2002-ci ilin iyulunda İngiltərə “Lids”indən “Mançester Yunayted”ə 30 milyon funt sterlinqə (35,7 milyon avro) keçib.